QafqazNews Oxu.az-a istinadən xəbər verir ki, Baku TV-nin “Kriminal” verilişinin ilk buraxılışında Ramana qəsəbəsinin “Şuşa şəhərciyi”ndə baş vermiş qətl hadisəsinin detalları təqdim olunub.
Hadisə 2026-cı il martın 3-də qeydə alınıb. Həmin gün saat 22 radələrində Sabunçu Rayon Prokurorluğuna 1980-ci il təvəllüdlü Zəfər Məmmədovun öldürülməsi barədə məlumat daxil olub. Qətldə şübhəli bilinən, mərhumla eyni evdə kirayədə qalan 1969-cu il təvəllüdlü Hüseyn Həsənov saxlanılıb.
İstintaqın müəyyənləşdirdiyinə görə, saat 21 radələrində Həsənovla Məmmədov yaşadıqları evdə spirtli içki qəbul ediblər. Həsənov tanışının özünü ondan üstün tutan danışıq və davranışlarından narazı qalıb. Qəzəblənərək məişət bıçağı ilə Məmmədovun döş qəfəsinə və bədəninin başqa nahiyələrinə 29 zərbə vurub və onu qəsdən öldürüb.
Həsənov istintaq zamanı 2008-ci ildə tanışı Bayram Bayramovu da qətlə yetirdiyini bildirib. Həmin cinayətə görə 15 il həbsdə olub, 2023-cü ildə azadlığa çıxıb. Onun sözlərinə görə, 2026-cı ilin yanvarından Zəfər Məmmədovla birgə kirayədə yaşayıb və aralarında vaxtaşırı mübahisələr baş verib. Həsənov hadisə günü Məmmədovun onu təhqir etməsinə əsəbiləşərək yatdığı yerdə ona hücum etdiyini deyib.
Bakı Ağır Cinayətlər Məhkəməsinin 2026-cı il iyunun 24-də çıxardığı hökmə əsasən, Hüseyn Həsənov 18 il 6 ay həbs cəzası alıb. Cəzasının ilk 3 ilini həbsxanada, qalan müddəti isə xüsusi rejimli cəzaçəkmə müəssisəsində çəkəcək.
