QafqazNews Lenta.ru-a istinadən xəbər verir ki, Rusiya Prezidenti Vladimir Putinlə İranın Ali Milli Təhlükəsizlik Şurasının katibi Məhsin Rəzai arasındakı görüş konstruktiv keçib və Tehranla Moskva arasında ikitərəfli və regional əməkdaşlığın gücləndirilməsinə dair mövqelərin yaxın olduğunu göstərib.

Moskvadakı İran səfiri Kazəm Cələli TASS-a bildirib ki, danışıqlar təxminən üç saat davam edib. Görüş zamanı geniş dairədə ikitərəfli, regional və beynəlxalq məsələlər müzakirə olunub.

Diplomatın sözlərinə görə, Putin və Rəzai Rusiya qazının İrana tədarükü layihəsinin aspektlərini müzakirə edib, həmçinin nüvə, müdafiə və digər strateji əməkdaşlıq sahələrində fikir mübadiləsi aparıblar.

Cələli əlavə edib ki, Rəzai həmçinin Tehranın regionda ölkələrin suverenliyinə hörmət olunması və xarici müdaxilənin qəbul edilməməsi ilə bağlı mövqeyini Putinə çatdırıb.

Görüş noyabrın 5-də, cümə günü, Kremlin binasında keçirilib.

Səfir həmçinin əvvəl bildirib ki, Məhsin Rəzainin Moskvaya səfərinin ilkin və əsas məqsədi İran ali rəhbəri Muctəba Xameneinin xüsusi və rəsmi mesajını Rusiya rəhbərinə çatdırmaq olub.