QafqazNews Manset.az-a istinadən xəbər verir ki, Yeni Azərbaycan Partiyasının 34 illik fəaliyyət yolu və VIII Qurultayda müəyyənləşdirilən prioritetlər ölkənin yeni inkişaf mərhələsinin əsas istiqamətlərini əhatə edir.
Azərbaycan müstəqilliyini bərpa etdikdən sonra, 1990-cı illərin əvvəlində siyasi və iqtisadi böhran, idarəetmədə çətinliklər və torpaqların işğalı təhlükəsi ilə üzləşmişdi. Həmin dövrün ictimai-siyasi mənzərəsi barədə çıxışlarında danışan Prezident İlham Əliyev gənclərin bu tarixi bilməsinin vacibliyini vurğulayıb. O, Heydər Əliyevin hakimiyyətə qayıdışının müstəqilliyin qorunmasında həlledici rolunu qeyd edib.
1992-ci ilin oktyabrında elm, mədəniyyət və ictimaiyyət nümayəndələrindən ibarət 91 nəfər Heydər Əliyevə müraciət edərək ondan yaradılacaq siyasi partiyaya rəhbərlik etməyi və ölkəni böhrandan çıxarmağa kömək göstərməyi istəyib. “91-lər”in müraciəti cəmiyyətdə milli birlik çağırışı kimi qəbul olunub. İlham Əliyev YAP-ın VII Qurultayındakı çıxışında həmin şəxslərin müraciətinin böyük cəsarət tələb etdiyini bildirib. O, o zamankı xaos və özbaşınalıq şəraitində partiyanın təsis konfransının Bakıda keçirilməsinə imkan verilmədiyini də xatırladıb.
Heydər Əliyev müraciətə müsbət cavab verib və 1992-ci ilin noyabrında Yeni Azərbaycan Partiyasının yaradılmasına rəhbərlik edib. Partiyanın təsis konfransı noyabrın 21-də Naxçıvanda keçirilib. Müxalifət təşkilatı kimi fəaliyyətə başlayan YAP qısa müddətdə müxtəlif təbəqələri öz ətrafında birləşdirib. Onun tərəfdarları partiyanın proqramında sabitlik və güclü dövlət quruculuğu perspektivini görürdülər.
Partiyanın təsisindən yeddi ay keçməmiş Heydər Əliyev xalqın təkidi ilə hakimiyyətə qayıdıb. Onun rəhbərliyi dövründə ölkədə sabitliyin bərpası, hüquqi dövlət quruculuğu, “Əsrin müqaviləsi”nin imzalanması, nizami ordunun yaradılması və balanslaşdırılmış xarici siyasətin formalaşdırılması istiqamətində addımlar atılıb. Qarabağ münaqişəsi ilə bağlı həqiqətlərin beynəlxalq ictimaiyyətə çatdırılması və məsələnin nüfuzlu beynəlxalq təşkilatların gündəliyinə çıxarılması da həmin siyasətin əsas istiqamətlərindən olub. Xaricdə yaşayan azərbaycanlıların birliyinin möhkəmləndirilməsi dövlət siyasətinin tərkib hissəsinə çevrilib.
Heydər Əliyevin müəyyən etdiyi siyasi xətt ətrafında birləşən YAP ölkənin aparıcı siyasi qüvvəsinə çevrilib. Partiya bu gün yüz minlərlə üzvü birləşdirir. Prezident İlham Əliyev YAP-ın fəaliyyətinin və qəbul etdiyi qərarların Azərbaycanla yanaşı, region üçün də əhəmiyyət daşıdığını bildirib.
Son 23 ildə İlham Əliyev Heydər Əliyevin siyasi kursunu müasir dövrün şərtlərinə uyğun davam etdirib. Bu siyasət nəticəsində Azərbaycan tarixi Zəfər qazanıb, ərazi bütövlüyünü və dövlət suverenliyini bərpa edib. Ölkə regional və beynəlxalq əməkdaşlıq təşəbbüsləri, nəqliyyat-logistika layihələri və enerji təhlükəsizliyinə töhfələri ilə mövqelərini gücləndirib. Bakı və işğaldan azad edilmiş ərazilər beynəlxalq tədbirlərin keçirildiyi məkanlar kimi də diqqət çəkir.
YAP-ın ilkin proqramında müəyyən edilmiş hədəflər 44 günlük Vətən müharibəsindəki qələbə ilə yeni mərhələyə keçib. Müharibədən sonrakı çağırışları nəzərə alaraq, 2021-ci il martın 5-də partiyanın VII Qurultayı keçirilib. İlham Əliyev yeni siyasi şəraitə uyğun proqram hazırlanması barədə tapşırıq verib. Qurultayda partiyanın yeni Nizamnaməsi qəbul olunub, 40 nəfərlik İdarə Heyəti, 13 nəfərlik Təftiş Komissiyası və 35 üzvdən ibarət Veteranlar Şurası yaradılıb. Mehriban Əliyeva həmin gün YAP Sədrinin birinci müavini təyin edilib.
Partiyanın yeni Proqramı 2021-ci il dekabrın 29-da İdarə Heyətinin iclasında təsdiqlənib. Beş fəsildən ibarət sənəddə partiyanın inkişafı, siyasi prinsiplər, fəaliyyət qaydaları və əsas hədəfləri yer alıb. Prioritetlər sırasında Heydər Əliyev irsinin təbliği, iqtisadi inkişaf, sosial təminat və insan kapitalı, şəffaflıq, vətəndaş cəmiyyəti, milli-mənəvi dəyərlərin qorunması, xarici siyasət, ordu quruculuğu və Böyük Qayıdış göstərilib.
VII Qurultaydan sonra ölkə həyatında baş verən mühüm hadisələr sırasında 2023-cü ilin sentyabrında suverenliyin bütün ərazilərdə bərpası, Qarabağ və Şərqi Zəngəzurda quruculuq işləri və Böyük Qayıdış proqramının icrası yer alır. 2025-ci il avqustun 8-də Vaşinqtonda Azərbaycan, ABŞ və Ermənistan liderlərinin iştirakı ilə keçirilən görüşdə iki ölkə arasında sülh və dövlətlərarası münasibətlərin qurulmasına dair saziş layihəsi paraflanıb, Birgə Bəyannamə imzalanıb. Tərəflər suverenlik, ərazi bütövlüyü və sərhədlərin toxunulmazlığına hörmət etdiklərini, güc tətbiqindən çəkinəcəklərini təsdiqləyiblər. Həmçinin ATƏT-in Minsk qrupunun fəaliyyətinin dayandırılması üçün müraciət və nəqliyyat əlaqələrinin, o cümlədən Azərbaycanın əsas hissəsi ilə Naxçıvan arasında maneəsiz bağlantının açılması istiqamətində addımlar razılaşdırılıb.
YAP siyasi dialoqu və iqtidarla müxalifət arasında sağlam münasibətləri təşviq etdiyini bildirir. Suverenliyin və ərazi bütövlüyünün bərpasından sonra bütün ölkə üzrə prezident, parlament və bələdiyyə seçkiləri keçirilib. 2024-cü il fevralın 7-də keçirilən prezident seçkilərində YAP-ın namizədi İlham Əliyev 92,12 faiz səs toplayıb. Həmin il sentyabrın 1-də keçirilən parlament seçkilərində partiya 68 mandat əldə edib. 2025-ci il yanvarın 29-da keçirilən bələdiyyə seçkilərində isə YAP-dan 5855 nəfər üzv seçilib.
Oktyabrın 2-də baş tutan VIII Qurultay ərazi bütövlüyü və suverenlik bərpa edildikdən sonra YAP-ın ilk qurultayı olub. İlham Əliyev çıxışında əvvəlki mərhələnin məqsədinin işğala son qoymaq və suverenliyi bərpa etmək olduğunu, hazırkı əsas vəzifələrin isə qələbəni möhkəmləndirmək, təhlükəsizlik və müdafiə imkanlarını artırmaq olduğunu bildirib. Yeni mərhələnin hədəflərinə Böyük Qayıdışın davamı, azad edilmiş ərazilərdə infrastruktur və yaşayış şəraitinin qurulması, hərbi gücün yüksəldilməsi, müstəqilliyin qorunması, sosial müdafiənin gücləndirilməsi və iqtisadi imkanların genişləndirilməsi daxildir. Qurultayda partiyanın Nizamnaməsinə dəyişikliklər təsdiqlənib, İdarə Heyəti və Təftiş Komissiyasının tərkibi müəyyənləşdirilərək üzvləri seçilib.
YAP-ın 34 illik fəaliyyətini bir yazıda tam əhatə etmək mümkün olmasa da, İlham Əliyevin VIII Qurultaydakı “Qələbələrimizin başlanğıcı məhz Yeni Azərbaycan Partiyasının təsis qurultayı və ondan sonrakı dövr idi” fikri partiyanın keçdiyi yolun ümumi qiymətləndirilməsi kimi təqdim olunub.