QafqazNews Baku.ws-a istinadən xəbər verir ki, Ramiz Mehdiyevin cinayət işi üzrə materiallarda “Şərq-Qərb” nəşriyyat evinin rəhbəri Sevil İsmayılovanın sənədlərin hazırlanması və Rusiyaya göndərilməsində adı çəkilir. Bakı Ağır Cinayətlər Məhkəməsinin hökmü ilə Prezident Administrasiyasının sabiq rəhbəri 14 il müddətinə azadlıqdan şərti məhrum edilib.
İş materiallarında qeyd olunur ki, Mehdiyev hazırladığı yazıları Rusiyanın yüksək vəzifəli şəxslərinə İsmayılova vasitəsilə çatdırırmış. Azərbaycanda dövlət idarəetmə sisteminin transformasiyasına dair təklifləri əhatə edən sənədin çapı və Rusiya tərəfinə ötürülməsi prosesində onun iştirakı göstərilir.
Mehdiyev ifadəsində əlyazmanın ölkənin son beş ildə qarşılaşdığı siyasi və idarəetmə problemlərini, mövcud vəziyyəti və gələcək perspektivləri əhatə etdiyini bildirib. İttiham aktında onun sözlərinə görə, sənədi avqustdan təxminən bir ay əvvəl yazmağa başlayıb və çap işini Sevil İsmayılovaya tapşırıb.
Mehdiyev sənədin ünvanının Rusiyanın Xarici Kəşfiyyat Xidməti olduğunu deyib. Materiallara əsasən, İsmayılovaya əlyazmanı Rəşad Kurbanov vasitəsilə xidmətin rəhbəri Narişkinə çatdırmaq tapşırılıb. Sənədin Rusiyanın başqa yüksəkvəzifəli şəxslərinə də göndərilməsi planlaşdırılıb.
İş materiallarında Mehdiyevlə İsmayılova arasında telefon danışığının məzmunu da yer alıb. Həmin söhbətdə Mehdiyev “Azərbaycanda dövlət idarəetmə sisteminin transformasiyası üzrə təklif” adlı sənədin Kurbanova göndərilməsini istəyib. Sənədin iki nüsxədə hazırlanması da müzakirə olunub.
İstintaq materiallarında yer alan danışıq mətnində İsmayılovanın belə dediyi göstərilir: “Mən ona dedim ki, iki nüsxədə olacaq, biri bir nəfərə, digəri başqasına”.
