QafqazNews Interfax-a istinadən xəbər verir ki, Türkmənistan və Pakistanın xarici işlər nazirləri Rəşid Meredov və Məhəmməd İshaq Dar enerji sahəsində əməkdaşlığın genişləndirilməsi məsələlərini müzakirə ediblər.

Görüş İslamabadda keçirilib və toplantı iki ölkə arasında 6-cı hökumətlərarası komissiyanın iclası ərəfəsində təşkil olunub. Nazirlər yüksək və ən yüksək səviyyələrdə müntəzəm siyasi dialoqun saxlanmasının və əvvəlki razılaşmaların ardıcıl icrasının əhəmiyyətini vurğulayıblar.

Xüsusi olaraq enerji sahəsində, o cümlədən qarşılıqlı maraq doğuran regional infrastruktur layihələrinin icrası kontekstində əməkdaşlığın daha da genişləndirilməsinə ehtiyac qeyd edilib.

Həmçinin ticarət-iqtisadi və investisiya sahələrində, energetikada, regional qarşılıqlı əlaqələrin inkişafında və mədəni-humanitar əlaqələrin möhkəmləndirilməsində tərəfdaşlığın artırılmasına diqqət yetirilib.

Görüş çərçivəsində sənaye, nəqliyyat və logistika sahələrində əməkdaşlığın fəallaşdırılması perspektivləri də müzakirə olunub. İki ölkənin beynəlxalq və regional təşkilatlar çərçivəsində qarşılıqlı fəaliyyət məsələlərinə də ayrıca yer verilib.

Görüş yekununda Türkmənistan və Pakistan arasında dostluq münasibətlərinin daha da inkişafı və ikitərəfli tərəfdaşlığın yeni praktik məzmunla zənginləşdirilməsi ilə bağlı qarşılıqlı maraq təsdiqlənib, deyə Türkmənistan Xarici İşlər Nazirliyinin saytı qeyd edir.