QafqazNews Konkret.az-a istinadən xəbər verir ki, Almaniyanın Ulm şəhərində küçədə qalan insanlara soyuq havada müvəqqəti sığınacaq vermək üçün günəş panelləri ilə çalışan yuxu kapsullarından istifadə olunur. “Ulmer Nest” adlı sosial layihə aşağı temperatur, külək və əlverişsiz hava şəraitindən qorunmağa imkan yaradır.
2019-cu ildə fəaliyyətə başlayan təşəbbüs ənənəvi gecələmə mərkəzlərinə gedə bilməyən və ya orada qalmaq istəməyən şəxslər üçün alternativ nəzərdə tutur. Bu qrupa tək qalmağa üstünlük verənlər, eləcə də sığınacaqlara ev heyvanları ilə qəbul olunmadıqları üçün küçədə gecələyənlər daxildir.
Kapsulların konstruksiyası möhkəm poladdan hazırlanıb, istilik izolyasiyası isə əlavə qorunma təmin edir. Qurğular yağışdan, küləkdən, nəmişlikdən və soyuqdan müdafiə məqsədi daşıyır.
Enerji təchizatında günəş panellərindən istifadə edilir. Onlar kapsulun texniki sistemlərini işlətmək üçün elektrik yaradır. Sensorlar daxildəki temperatur və havalandırma vəziyyətinə nəzarət edir.
İstifadəçi kapsula girib qapını içəridən bağladıqda, sistem yerli sosial dəstək xidmətlərinə bildiriş göndərə bilər. Bununla sosial işçilər kapsulun dolu olduğunu vaxtında öyrənirlər.
Səhərlər sosial xidmət əməkdaşları qurğunun vəziyyətini yoxlayır və gecələyən şəxslə əlaqə qururlar. Yardıma ehtiyac olduqda dəstək təklif edilir, həmçinin sosial xidmətlər, müvəqqəti yerləşmə və daimi mənzil imkanları barədə məlumat verilir.
“Ulmer Nest” daimi yaşayış yeri kimi nəzərdə tutulmayıb və ənənəvi sığınacaqların əvəzi deyil. Layihə soyuq qış gecələrində küçədə qalan insanlara əlavə qorunma və təhlükəsizlik yaratmağa yönəlib. Günəş enerjisi, texniki sistemlər və sosial xidmətlər bu təşəbbüsdə birləşdirilib.
