QafqazNews Manset.az-a istinadən xəbər verir ki, Azərbaycan Dəmir Yollarının (ADY) rəhbərliyi ictimai nəqliyyat, logistika, turizm və beynəlxalq nəqliyyat dəhlizləri üzrə mütəxəssislərlə bir araya gəlib.
Görüş iştirakçıları son illərdə görülən işləri, sərnişin və yük daşımalarının nəticələrini, dəmir yolu şəbəkəsinin yenilənməsini, beynəlxalq marşrutların inkişafını və qarşıda duran məsələləri müzakirə ediblər. Gələcək fəaliyyət istiqamətləri ilə bağlı fikir mübadiləsi də aparılıb.
ADY sədri Rövşən Rüstəmov dəmir yolunun ölkənin sosial-iqtisadi inkişafına, insanların mobilliyinə və Azərbaycanın beynəlxalq nəqliyyat-logistika mərkəzi kimi mövqeyinə töhfə verdiyini bildirib. Onun sözlərinə görə, sərnişin məmnuniyyətinin və xidmət səviyyəsinin artırılması, təhlükəsiz və dayanıqlı daşımaların təşkili qurumun əsas prioritetləri sırasındadır.
Bildirilib ki, 2026-cı ilin yanvar-oktyabr aylarında ADY 9,8 milyon sərnişin daşıyıb. Bu rəqəm ötən ilin eyni dövründən 19 faiz yüksəkdir. Oktyabrda isə aylıq sərnişindaşıma göstəricisi 1,3 milyon nəfəri ötərək ən yüksək həddə çatıb. Abşeron dairəvi dəmir yolunda gündəlik sərnişin sayı son iki ildə 36 mindən 52 minə yüksəlib.
Sərnişindaşımadakı yeniliklər sırasında marşrutların açılması, işlək xətlərin bərpası və yeni hərəkət tərkibinin əldə olunması qeyd edilib. Bakı–Balakən və Bakı–Ağdam reyslərinin bərpası, Bakı–Ağstafa xəttinin Qazaxa qədər uzadılması, Gəncə–Qəbələ arasında gündəlik səfərlərin təşkili, eləcə də Bakı–Tbilisi–Bakı beynəlxalq əlaqəsinin yenidən işə salınması diqqətə çatdırılıb.
Abşeronda nəqliyyat müzakirələri sərnişin sıxlığının azaldılması, qatarların hərəkət vaxtlarının yaxşılaşdırılması, Xırdalan istiqamətində infrastrukturun yenilənməsi, stansiya və dayanacaqların rahatlığının artırılmasını əhatə edib. Bakı–Xırdalan–Sumqayıt və Bakı–Pirşağı–Sumqayıt xətlərinin təkmilləşdirilməsi, şəhərətrafı yeni marşrutların bərpası və 20 sərnişin qatarının alınması üzrə işlər barədə məlumat verilib.
Rəqəmsal xidmətlərə dair müzakirələrdə internet üzərindən bilet satışının yaxşılaşdırılması, sərnişinlərə vaxtında məlumat verilməsi, ödəniş həllərinin müasirləşdirilməsi və xidmətlərdən istifadə imkanlarının genişləndirilməsi məsələləri yer alıb.
Görüşdə Azərbaycanın beynəlxalq dəhlizlərdə tranzit imkanlarının artırılması da əsas mövzulardan olub. 2026-cı ilin ilk 10 ayında ADY-nin yükdaşıma həcmi illik müqayisədə 13 faiz artaraq 15,7 milyon ton təşkil edib. Tranzit yüklərin həcmi isə 20 faiz yüksəlib.
Orta Dəhliz və Şimal–Cənub istiqamətlərinin inkişafı, Bakı–Tbilisi–Qars xəttinin yenilənməsi, Horadiz–Ağbənd dəmir yolunun inşası, Astara Terminalının tikintisi və Bakı Limanının imkanlarının genişləndirilməsi barədə danışılıb. Modernləşdirmədən sonra Bakı–Tbilisi–Qars xəttinin illik yükötürmə gücü 1 milyon tondan 5 milyon tona çatıb.
Bakı Limanının ADY tərəfindən idarə olunmasının dəmir yolu ilə dəniz daşımalarının əlaqələndirilməsini gücləndirmək üçün yaratdığı imkanlar da nəzərdən keçirilib. Bu ilin ilk 10 ayında limanda 112 mindən çox TEU konteyner aşırılıb. Həcm 31 faiz artaraq rekord səviyyəyə yüksəlib.
Beynəlxalq daşımaların rəqabət qabiliyyətinin artırılması, logistika zəncirindəki maneələrin aradan qaldırılması, vaqon parkının böyüdülməsi, sərhəd prosedurlarının sadələşdirilməsi, yük daşımalarında rəqəmsal həllər və süni intellektdən yararlanma məsələləri ayrıca müzakirə olunub.
Dəmir yolunun turizmə təsiri də gündəmdə olub. Regionlara sərnişin marşrutlarının artırılmasının daxili turizmi təşviq etdiyi, bölgələrə nəqliyyat əlçatanlığını və regional iqtisadi fəallığı yüksəltdiyi bildirilib.
ADY rəhbərliyi ekspertlərin suallarını cavablandırıb və təkliflərini dinləyib. Xidmətlərin təkmilləşdirilməsi üçün davam edən və nəzərdə tutulan tədbirlər barədə də məlumat verilib.
Sonda Rövşən Rüstəmov ekspertlərlə açıq və konstruktiv ünsiyyətin əhəmiyyətini vurğulayıb. O bildirib ki, belə görüşlər fikir mübadiləsinə, peşəkar təkliflərin nəzərə alınmasına və dəmir yolu nəqliyyatının inkişaf istiqamətlərinin müəyyən edilməsinə kömək edir. ADY-nin sahə mütəxəssisləri ilə əməkdaşlığı davam etdirməkdə maraqlı olduğu qeyd olunub.
