QafqazNews Konkret.az-a istinadən xəbər verir ki, 2026-cı ilin ilk on ayında Azərbaycanda əhalinin nominal gəlirləri 81 milyard 10,7 milyon manat təşkil edib.
Dövlət Statistika Komitəsinin məlumatına görə, göstərici ötən ilin eyni dövrünə nəzərən 9,9 faiz yüksəlib. Yanvar-sentyabr aylarında illik artım 9,6 faiz olduğundan, oktyabrın sonuna gəlirlərin artım tempi 0,3 faiz bəndi sürətlənib.
Əməkhaqqı üzrə də artım qeydə alınıb. 2026-cı ilin yanvar-sentyabr aylarında ölkədə orta aylıq nominal əməkhaqqı 1 172,7 manat olub. Bu məbləğ 2025-ci ilin müvafiq dövründən 7,8 faiz yüksəkdir. Yanvar-avqustda illik artım 7,2 faiz təşkil etmişdi; sentyabrın yekunları ilə temp 0,6 faiz bəndi artıb.
Hesabat müddətində istehlak qiymətləri indeksi, başqa sözlə inflyasiya, 5,6 faiz təşkil edib. Yanvar-sentyabr aylarında illik inflyasiya 5,7 faiz səviyyəsində qeydə alınmışdı. Beləliklə, oktyabrın yekunları üzrə inflyasiya tempi 0,1 faiz bəndi azalıb.
