QafqazNews Baku.ws-a istinadən xəbər verir ki, Milli Məclisin iclasında spiker Sahibə Qafarova ilə deputat Səyyad Aran arasında çıxış müddəti ilə bağlı mübahisə yaşanıb.
Aran ona ayrılan vaxtın məhdudlaşdırılmasına etiraz edərək əvvəlcədən müəyyən edilmiş 10 dəqiqəlik müddətə əməl etdiyini bildirib. O, bəzi deputatların çıxışların beş və ya üç dəqiqə ilə məhdudlaşdırılmasını təklif etməsinə qarşı çıxıb və Türkiyə parlamentində, Ali Radada və Dumada danışıq müddətinə sərhəd qoyulmadığını deyib. Deputat itirdiyi bir dəqiqənin nəzərə alınmasını istəyib.
Sahibə Qafarova cavabında deputata “danışmaqxana” deyil, parlament ifadəsinin işlədilməli olduğunu bildirib və parlament etikası ilə leksikasına riayət etməyə çağırıb. Spikerin sözlərinə görə, çıxış reqlamentinin beş dəqiqə artırılması təklif olunub və bu, səs çoxluğu ilə qəbul edilib.
Qafarova əlavə edib ki, Aran daha artıq vaxt istəyirsə, bunu bildirməli idi və ona əlavə bir dəqiqə verilə bilərdi. Spiker deputata çıxışını davam etdirməyi təklif edib.