QafqazNews Oxu.az-a istinadən xəbər verir ki, siyasi şərhçi Fərid Şahbazlı 2028-ci ilin mayında Bakıda keçiriləcək Avropa Siyasi Birliyinin Zirvə görüşünün Azərbaycanla Avropa arasında siyasi dialoqu genişləndirmək və əməkdaşlıq imkanlarını artırmaq baxımından əhəmiyyət daşıyacağını bildirib.
“İslahatçı Gənclər” İctimai Birliyinin sədri qeyd edib ki, Azərbaycanın sammitə ev sahibliyi beynəlxalq münasibətlərdə artan rolunu və çoxtərəfli diplomatiyadakı mövqeyini göstərir. Onun sözlərinə görə, ölkənin əvvəlki görüşlərdə fəal iştirakı Avropa ilə siyasi dialoqa verilən önəmi nümayiş etdirir.
Şahbazlı bildirib ki, Dublin sammiti çərçivəsində Prezident İlham Əliyevin Avropa İttifaqı Şurasının Prezidenti, eləcə də bir sıra dövlət və hökumət rəhbərləri ilə görüşləri Azərbaycanın regional təhlükəsizlik, sülh və əməkdaşlıq məsələlərindəki mövqeyini beynəlxalq tərəfdaşlara çatdırmaq üçün əhəmiyyətli olub.
O, Azərbaycanla Böyük Britaniya arasında imzalanan Strateji Tərəfdaşlıq haqqında birgə bəyannamənin əlaqələrin yeni istiqamətlərdə inkişafı üçün institusional zəmin yaratdığını vurğulayıb. Sənəd müdafiə və təhlükəsizlik, ticarət və investisiya, təhsil və innovasiya sahələrini əhatə edir.
Şərhçinin fikrincə, Azərbaycanın Avropa üçün əhəmiyyəti enerji və nəqliyyat imkanları ilə məhdudlaşmır. Ölkə Cənubi Qafqazda sülh gündəliyinin irəlilədilməsi, Avropa ilə Mərkəzi Asiyanın əlaqələrinin genişləndirilməsi, Orta Dəhlizin inkişafı və regional iqtisadi əməkdaşlığın gücləndirilməsində də mühüm yer tutur.
Şahbazlı hesab edir ki, Bakı sammitinə ev sahibliyi etmək Azərbaycanın beynəlxalq müzakirələrdə iştirakından əlavə, həmin müzakirələrin keçirildiyi platformanı təmin etməsi baxımından da üstünlükdür. Bu, ölkəyə öz təşəbbüs və regional baxışlarını, gələcəyə hesablanmış əməkdaşlıq təkliflərini geniş auditoriyaya çatdırmaq imkanı verəcək.
O əlavə edib ki, Azərbaycan Avropa ilə əlaqələrini inkişaf etdirərkən Türkiyə, Mərkəzi Asiya, MDB və islam dünyası ilə əməkdaşlığını da davam etdirir. Bu istiqamətlərin paralel inkişafı ölkənin beynəlxalq tərəfdaşlıq imkanlarını genişləndirir.
Şərhçinin sözlərinə görə, növbəti iki ildə Bakı sammitinin siyasi və praktiki nəticələrini əvvəlcədən müəyyənləşdirmək əsas vəzifələrdən biri olmalıdır. Süni intellekt, rəqəmsal iqtisadiyyat, yaşıl enerji, təhsil, investisiya və nəqliyyat üzrə yeni əməkdaşlıq təşəbbüslərinin hazırlanması xüsusi əhəmiyyət daşıyır.
Şahbazlı sammiti yalnız yüksək səviyyəli beynəlxalq tədbir deyil, Azərbaycanın Avropa ilə gələcək əməkdaşlıq istiqamətlərini müəyyənləşdirmək üçün mühüm fürsət kimi qiymətləndirib. O, siyasi dialoqun konkret layihələrlə tamamlanmasının və regional təşəbbüslərə beynəlxalq dəstəyin genişləndirilməsinin vacibliyini qeyd edib.