QafqazNews Bakupost.az-a istinadən xəbər verir ki, Xəzərdə növbəsi dəyişdirilməyən 70-80 neftçinin günlərdir dənizdə qaldığı və ərzaqla içməli su ehtiyatlarının azaldığı bildirilir. Bu barədə “Neftçilərin Hüquqlarının Müdafiəsi Təşkilatı” İctimai Birliyinin sədri Mirvari Qəhrəmanlı məlumat verib.
Onun sözlərinə görə, Nərimanov adına Neft və Qazçıxarma İdarəsinin 3-cü mədənində çalışanların növbəsi noyabrın 5-də dəyişdirilməli idi, lakin proses hələ də baş tutmayıb. Növbənin nə vaxt yenilənəcəyi də məlum deyil.
Qəhrəmanlı dənizdə qalan işçilərin su, çörək, yemək və siqaret ehtiyatlarının tükəndiyini, gəminin nə zaman gələcəyinə dair məlumat verilmədiyini bildirib. O, işıqların da söndüyünü, yaranmış şəraitin həm dənizdə olanların, həm də işə gedə bilməyənlərin psixoloji durumuna təsir etdiyini qeyd edib. Təşkilat sədri vəziyyəti ağır adlandıraraq, işçilərin çətin şəraitdə növbə dəyişikliyi gözlədiyini vurğulayıb.
SOCAR-dan bildirilib ki, “Azneft” İstehsalat Birliyinin dəniz obyektlərində növbə dəyişməsinin əlverişsiz hava üzündən təxirə düşməsi vaxtaşırı baş verir. Qurum gecikmənin əsas səbəbi kimi son günlər Xəzərdə müşahidə olunan güclü külək və fırtınanı göstərib.
Şirkətin açıqlamasına görə, hava şəraiti imkan verəndə gəmi resurslarından səmərəli istifadə, alternativ gəmilərin cəlb edilməsi və əlaqədar qurumlarla koordinasiya vasitəsilə növbə dəyişdiriləcək. Növbə müddətinin uzanması nəzərə alınaraq, yedək və digər gəmilərlə dəniz özüllərinə ərzaq və içməli su çatdırıldığı, işçilərin gündəlik tələbatlarının ödənməsində çətinlik olmadığı bildirilib.
SOCAR əlverişli hava gözlənilən 2026-cı il noyabrın 14-dən “Azneft” İB-nin dəniz platformalarında növbə dəyişmə əməliyyatlarının normal qaydada bərpasını planlaşdırır. Ayrı-ayrı dəniz sahələrində prosesin mərhələli davam etdiyi, bütün əməliyyatların təhlükəsizlik tələblərinə uyğun aparılmasının əsas məqsəd olduğu qeyd edilib.
