QafqazNews Demokrat.az-a istinadən xəbər verir ki, Azərbaycan və Ermənistanın vətəndaş cəmiyyəti nümayəndələrinin növbəti təmasının Ermənistanda keçirilməsi planlaşdırılır. Tərəflərin əvvəlki görüşlərindən biri ötən il oktyabrın 25-də İrəvanda, digəri noyabrda Bakıda, sonuncusu isə Qəbələdə təşkil olunub.

Sülh gündəliyi ilə yanaşı, Ermənistan Konstitusiyasına dəyişiklik məsələsi də diqqətdədir. Azərbaycanın bu mövzuda həssas yanaşdığı məqamlar mövcuddur. Ermənistan hökuməti hazırda beynəlxalq platformalarda Qarabağ məsələsini qaldırmır. Baş nazir Nikol Paşinyan isə Qarabağ mövzusunun ölkəsinin inkişafına və gələcəyinə əngəl yaratdığını bildirir.

Politoloq Oqtay Qasımov görüşlərin nəticələri və gələcək formatı barədə açıqlamasında deyib ki, iki ölkənin QHT və ictimaiyyət təmsilçilərinin təmasları tədricən ənənəyə çevrilir.

Qasımovun fikrincə, ötən ildən aparılan dialoqun məqsədi ikitərəfli münasibətlərin müxtəlif tərəflərini müzakirə etmək, qarşılıqlı etimadı formalaşdırmaq və gücləndirməkdir. O, sülh sazişinin imzalanması və gələcək əlaqələrin qurulması baxımından bu prosesin əhəmiyyət daşıdığını vurğulayıb.

Politoloq əvvəlki görüşlərdə təmsil olunan heyətlərin genişləndirilməsini mümkün sayıb. Onun sözlərinə görə, proses müsbət davam edərsə, iştirakçıların sayı və təmsilçilik səviyyəsi yüksələ bilər ki, bu da münasibətlərin normallaşmasına dəstək verər. Müzakirələrdə Ermənistan Konstitusiyasına dəyişiklik, Qarabağın keçmiş erməni sakinləri və digər mövzuların da yer alacağını bildirib.

Qasımov qeyd edib ki, bu məsələlər görüşlərdə konkret şəkildə müzakirə olunmalı, əsas diqqət tərəflərin ortaq maraqlarına və normallaşma üçün razılaşdırıla biləcək addımlara yönəlməlidir.

Politoloq belə təmasların sülh prosesinə sürət verə biləcəyini də söyləyib. Onun qənaətinə görə, prosesə təkan verən mühüm amillərdən biri Ermənistanda Konstitusiya dəyişiklikləri ilə bağlı referendumun keçirilməsi və müsbət nəticə əldə olunmasıdır. Bundan sonra sülh sazişinin imzalanması mümkün ola bilər.

Qasımovun sözlərinə görə, sazişin imzalanması iki ölkə arasında münasibətlərin dərhal və sürətlə bərpa olunacağı demək deyil. Buna görə gələcək əlaqələrin möhkəm əsasda qurulması üçün qarşılıqlı etimad mühitinin yaradılması vacibdir. O, ictimaiyyət nümayəndələrinin müntəzəm görüşlərini müsbət qiymətləndirib.