QafqazNews Yenisabah.az-a istinadən xəbər verir ki, Prezident İlham Əliyev Milli Məclisin oktyabrın 23-də qəbul etdiyi “Dövlət satınalmaları haqqında” qanuna dəyişiklikləri təsdiqləyib. Dəyişikliklər müəyyən hüquqi şəxslərin digər maliyyə mənbələrindən istifadə etməklə apardığı satınalmalara ayrıca qaydaların müəyyənləşdirilməsini və müqavilələrin elektron formada rəsmiləşdirilməsini nəzərdə tutur. Təchizatçının qeyri-rezident olduğu hallar elektron rəsmiləşdirmə tələbinə daxil deyil.
Dəyişikliklərin məqsədi qanunun 3.2.8-1-ci altmaddəsində göstərilən hüquqi şəxslərin müəyyən maliyyə mənbələri xaricindəki vəsaitlər hesabına apardığı satınalmaları qanunun tətbiq dairəsindən çıxarmaqdır.
Yeni maddə müvafiq icra hakimiyyəti orqanının müəyyən etdiyi qurumu, onun idarəçiliyindəki dövlət müəssisələrini, dövlət payı olan təsərrüfat cəmiyyətlərini və publik hüquqi şəxsləri əhatə edir. Həmin qurumların təsisçisi və ya iştirakçısı olduğu hüquqi şəxslərin satınalmaları da iştirak paylarına mütənasib şəkildə bu əhatəyə daxildir.
İstisna yalnız satınalmalar digər maliyyə vəsaiti ilə həyata keçiriləndə tətbiq olunur. Dövlət və Naxçıvan Muxtar Respublikasının büdcələrindən, o cümlədən məqsədli büdcə fondlarından ayrılan vəsaitlər, büdcə ssudaları, subsidiyalar, dövlət zəmanəti ilə götürülmüş kreditlər, dövlət qrantları və yardımları, eləcə də büdcədənkənar dövlət fondlarının vəsaitləri bu istisnaya aid deyil.
Qanunun 3.2.8-ci maddəsinə düzəliş həmin hüquqi şəxsləri bu maddənin əhatəsindən çıxararaq ayrıca kateqoriya kimi müəyyən edir. Yeni 3.10-1-ci maddəyə əsasən, onların mal, iş və xidmət satınalmalarının qaydasını müvafiq icra hakimiyyəti orqanının müəyyən etdiyi qurum təsdiqləyəcək.
Bu hüquqi şəxslərin satınalmaları üzrə müqavilələrin bağlanması və göndərilməsi informasiya sistemi vasitəsilə elektron qaydada aparılmalıdır. Qalib təchizatçının qeyri-rezident olduğu hallar və qanunun 15.3-cü maddəsində nəzərdə tutulan satınalmalar bu tələbdən istisna edilib.