QafqazNews Oxu.az-a istinadən xəbər verir ki, ABŞ Prezidenti Donald Tramp Vladimir Putinin Ukrayna ilə müharibənin diplomatik yolla sona çatmasını istədiyini bildirib. O, bu fikirləri APEC sammiti çərçivəsində Rusiya Prezidenti ilə görüşdən sonra təşkil olunan mətbuat konfransında səsləndirib.

Trampın sözlərinə görə, Putin Rusiya ilə Ukrayna arasındakı müharibənin diplomatik həllini açıq şəkildə dəstəkləyib. ABŞ lideri danışıqların müsbət irəlilədiyini deyərək, müharibənin başa çatdırılması üçün yaxşı imkan yarandığını vurğulayıb.

ABŞ Prezidenti noyabrın 19-da Rusiya, Çin və ABŞ liderlərinin iştirakı ilə baş tutan üçtərəfli görüşü “möhtəşəm və inanılmaz” kimi xarakterizə edib. Putin və Tramp həmin gün Çinin Şençjen şəhərində bir araya gəliblər. Görüşün başlanğıcında Tramp danışıqlardan konkret nəticələr gözlədiyini söyləyib.

Putinlə münasibətləri barədə sualı cavablandıran Tramp ABŞ adından danışa bilməyəcəyini, lakin Rusiya lideri ilə əlaqələrinin çox yaxşı olduğunu bildirib.

Görüşdən sonra Putin tərəflərin Trampın təşəbbüsü ilə Ukrayna müharibəsinə xüsusi diqqət ayırdıqlarını qeyd edib. Tramp da söhbətin əsas mövzusunun Ukrayna olduğunu təsdiqləyib.

Mətbuat konfransında Putin Moskvanın Ankoricdə keçirilən Alyaska sammitindən əvvəl ABŞ-nin təklif etdiyi kompromisləri qəbul etdiyini deyib. Onun sözlərinə görə, növbəti addımlar Kiyevin qərarından asılıdır. Bununla belə, Ukrayna ərazi məsələləri də daxil olmaqla, müvafiq şərtləri qəbul etməyə hazır olduğunu hələ bildirməyib.

Putin Moskvanın Kiyevə qarşı addımlarında təmkinli davranmasını diplomatik həll üçün imkanları qorumaq istəyi ilə əsaslandırıb. O, sülh sazişinə çatmaq üçün ən azı müəyyən imkanların saxlanılmasını istədiklərini və bu mövqenin praqmatik olduğunu bildirib.