QafqazNews TASS-a istinadən xəbər verir ki, Türkiyə və Rusiya prezidentləri Rəcəb Tayyib Ərdoğan və Vladimir Putin Akkuyu Atom Elektrik Stansiyası layihəsinin reallaşması üçün səylər göstəriblər və bu, Türkiyənin təxminən 70 illik nüvə energetikası arzularını gerçəyə çevirir.
Bu fikirləri Türkiyənin Energetika və Təbii Sərvətlər naziri Alparslan Bayraktar Antalya şəhərində keçirilən "Dünya Atom Günləri" forumunda bildirib. Nazir layihələrin həyata keçirilməsi üçün üç əsas amildən danışıb: ixtisaslı və peşəkar kadrların hazırlanması, əhəmiyyətli investisiyalar və kapitalın cəlb edilməsi, həmçinin layihə üçün siyasi iradə.
Bayraktar qeyd edib ki, Rusatom ilə həyata keçirilən layihələr çərçivəsində Türkiyədə mütəxəssislərin hazırlanmasına xüsusi diqqət ayrılır. O əlavə edib ki, prezidentlər Putin və Ərdoğan layihəyə sadiqlik göstərərək, uzun illərdir arzulanan nüvə proqramının həyata keçirilməsinə şərait yaradıblar.
Nazirin sözlərinə görə, yaxın gələcəkdə Akkuyu AES-in ilk reaktorunun istifadəyə veriləcəyinə və stansiyanın ilk elektrik enerjisini istehsal edəcəyinə inam var. O həmçinin vurğulayıb ki, bu işlər Sinop və Trakiya layihələri ilə davam etdiriləcək və enerji balansına kiçik modul reaktorlar da daxil ediləcək.
