QafqazNews Demokrat.az-a istinadən xəbər verir ki, Şuşanın azad olunmasında iştirak etmiş mayor və İkinci Qarabağ müharibəsi iştirakçısı Elşad Təhməzov Zəfər gününü döyüş meydanında keçirməyin təəssüratlarını bölüşüb.
O bildirib ki, 8 noyabr Zəfər bayramını Xüsusi Təyinatlı Qüvvələrin hərbçisi kimi, xüsusilə Şuşada yaşamağın hisslərini sözlərlə anlatmaq çətindir. Təhməzovun sözlərinə görə, 44 günlük Vətən müharibəsinin başlanğıcının və Şuşada başa çatmasının xalqın yaddaşında xüsusi yeri var. O, qələbənin hansı çətinliklər bahasına əldə olunduğunu və torpaqların təxminən 30 il işğal altında qaldığını unutmamağın vacibliyini vurğulayıb.
Təhməzov qeyd edib ki, müharibənin ilk günündən azad edilən hər təpə, dağ və yaşayış məntəqəsi tarixi qələbəyə yaxınlaşdırırdı. Hər irəliləyiş döyüşçülərin qisas hissini gücləndirirdi. Cəbrayılın azad edilməsi düşmənin mənəvi müqavimətini sarsıdıb, təminat yollarının nəzarətə götürülməsinə imkan yaradıb. Daha sonra Qarabağın cənub qapısı sayılan Hadrutun azad edilməsi əməliyyatı başlanıb, ardınca Füzulinin düşməndən təmizlənməsi uğrunda döyüşlər aparılıb.
O, Prezident İlham Əliyevin qətiyyətli mövqeyinin və iradəsinin cəbhədəki hərbçilərə ruh yüksəkliyi, özünəinam verdiyini söyləyib. Təhməzovun fikrincə, həm döyüş meydanında, həm də siyasi müstəvidə mübarizə aparılırdı və hərbi əməliyyatlar onları Qarabağın tarixi-mədəni mərkəzi Şuşaya doğru aparırdı.
Təhməzov Şuşa əməliyyatının planlaşdırılmasını və həyata keçirilməsini dünya hərb tarixinin seçilən nümunələrindən biri kimi dəyərləndirib. Onun sözlərinə görə, ağır silahlardan istifadə etmədən, sıldırım qayalarla əhatələnən və çətin dağ relyefində yerləşən şəhəri azad etmək mürəkkəb əməliyyat idi. Bu tapşırıqda uzun müddət ən çətin döyüşlərə hazırlaşmış Xüsusi Təyinatlı Qüvvələrin əsas bölmələri, Daxili Qoşunların xüsusi təyinatlıları və digər qoşun növlərinin peşəkar hərbçiləri iştirak ediblər. Şəhərə sıldırım qayalardan qalxaraq daxil olan hərbçilər onu noyabrın 8-də düşməndən tamamilə azad ediblər.
Şuşada qələbə anlarını heç vaxt unutmayacağını deyən mayor həmin vaxt döyüşçülərin həm sevinc, həm də kədər yaşadığını bildirib. Kədərin səbəbi minlərlə şəhidin verilməsi, sevincin səbəbi isə tarixi Zəfərin qazanılması olub. O, Şuşada Prezident İlham Əliyevin düşmənin məğlubiyyətə uğraması və kapitulyasiya aktını imzalayaraq digər rayonları qeyd-şərtsiz boşaldıb təhvil verməsi barədə çıxışını izləyərkən insanların göz yaşlarını saxlaya bilmədiyini xatırladıb.
Təhməzovun sözlərinə görə, Zəfər xalqın yaddaşında əbədi qalacaq və onu gələcək nəsillərə çatdırmaq hər bir vətəndaşın borcudur. O, şəhidlərə rəhmət, qazilərə və veteranlara cansağlığı arzulayıb, millətə bir daha soyqırımı və faciələr yaşanmamasını diləyib.
