QafqazNews Demokrat.az-a istinadən xəbər verir ki, Sumqayıt Şəhər İcra Hakimiyyətinin başçısı Zakir Fərəcovun rəhbərliyi ilə 2026-2027-ci illərin payız-qış mövsümünə hazırlıqla bağlı müşavirə keçirilib. Görüşdə görülən işlər və qarşıdakı dövr üçün nəzərdə tutulan vəzifələr nəzərdən keçirilib.

İştirakçılar şəhərin müxtəlif təsərrüfat sahələrində mövsümlə bağlı həyata keçirilən tədbirləri, mövcud durumu və kommunal xidmətlərin təşkilini müzakirə ediblər. Qarşıdakı müddətdə icrası vacib olan işlər də diqqət mərkəzində olub.

Zakir Fərəcov bildirib ki, mövsüm boyu sakinlərin istilik, təbii qaz, elektrik enerjisi və içməli su ilə fasiləsiz təminatı, xidmətlərin dayanıqlı fəaliyyəti və keyfiyyətinin artırılması əsas prioritetlər sırasındadır. Onun sözlərinə görə, aidiyyəti qurumlar zəruri tədbirləri görməli, resurslardan səmərəli yararlanmalı və yarana biləcək çətinlikləri çevik şəkildə həll etməlidirlər.

Məlumat verilib ki, son illərdə Sumqayıtda aparılan abadlıq və quruculuq işləri, infrastruktur layihələri, eləcə də kommunal təsərrüfatın yenilənməsi şəhərin infrastruktur imkanlarını genişləndirib. Mühəndis-kommunikasiya xətlərinin yenilənməsi, enerji və su təchizatı sistemlərinin təkmilləşdirilməsi şəhər təsərrüfatının dayanıqlığına və kommunal xidmətlərin yaxşılaşmasına töhfə verib.

Müşavirədə yaşayış binaları, təhsil və səhiyyə müəssisələri, eləcə də digər sosial obyektlərin istilik sistemlərinin davamlı yoxlanılması vacib sayılıb. Nasazlıqların vaxtında aradan qaldırılması və texniki xidmətin keyfiyyətlə görülməsi vurğulanıb. “Azəriqaz”, “Azərişıq”, su təchizatı və digər kommunal sahələr üzrə qurumların qarşısında duran işlər də müzakirəyə çıxarılıb; təmir-bərpa tədbirlərinin çevik və keyfiyyətli icrasının əhəmiyyəti qeyd olunub.

İdarə, müəssisə və təşkilat rəhbərləri öz sahələrindəki işlər, hazırkı vəziyyət, üzləşdikləri məsələlər və onların həlli üçün planlaşdırılan addımlar barədə məlumat veriblər. Kommunal xidmətlərin fasiləsizliyi, infrastrukturun normal işləməsi və mümkün fövqəladə hallara operativ reaksiya imkanlarının artırılması ilə bağlı fikir mübadiləsi aparılıb.

Yekunda Zakir Fərəcov aidiyyəti qurumların rəhbərlərinə şəhər təsərrüfatının müxtəlif sahələrində işləri uzlaşdırmaq, kommunal xidmətlərin fasiləsizliyini qorumaq, aşkarlanan çatışmazlıqları vaxtında aradan qaldırmaq və sakinlərin müraciətlərinə çevik baxmaq barədə tapşırıq və tövsiyələr verib.

Qeyd olunub ki, payız-qış mövsümündə şəhər təsərrüfatına nəzarət gücləndiriləcək, qurumların əməkdaşlığı təmin ediləcək. Əhalinin rahat və təhlükəsiz yaşayışı, habelə kommunal xidmətlərin keyfiyyətinin yüksəldilməsi üçün tədbirlər davam etdiriləcək.