QafqazNews Nocomment.az-a istinadən xəbər verir ki, ABŞ Konqresinin hər iki palatasında Demokratların seçkilərdə qazandığı üstünlük Cənubi Qafqazın gələcək siyasi gündəliyi ilə bağlı suallar yaradıb. Diqqət çəkən məqamlardan biri Amerika Erməni Milli Komitəsinin (ANCA) dəstəklədiyi namizədlərin uğurudur. Təşkilatın açıq dəstək verdiyi 64 namizəddən 7-si Senata, 50-si isə Nümayəndələr Palatasına seçilib. Beləliklə, Konqresdə ümumilikdə 57 ermənipərəst qanunverici təmsil olunur. Bu mənzərənin Vaşinqtonun region siyasətinə və Azərbaycanla münasibətlərinə təsir göstərə biləcəyi bildirilir.

ANCA-nın uzun müddətdir müdafiə etdiyi siyasi mövqelərdən biri ABŞ-ın Azərbaycana hərbi və təhlükəsizlik sahələrində yardımının azaldılmasıdır. Təşkilat, həmçinin 907-ci düzəlişin tətbiqinin sərtləşdirilməsini prioritetlər sırasında saxlayır. 1992-ci ildə qəbul edilən bu düzəliş Azərbaycana birbaşa dövlət yardımını qadağan edib. Məhdudiyyət prezidentlərin hər il xüsusi imtina səlahiyyətindən istifadə etməsi ilə qüvvədən düşmüş vəziyyətdə qalıb.

Konqresdə ermənipərəst qrupun güclənməsi həmin imtina səlahiyyətinin ləğv edilməsi və Azərbaycana təzyiqlərin artırılması cəhdlərinə yol aça bilər. ANCA-nın gündəmə gətirdiyi digər məsələlərdən biri Qarabağdan köçmüş ermənilərin təhlükəsiz qayıdışı ilə bağlı iddiadır. Mənbədə bu mövzunun rəsmi Bakının suverenliyinə qarşı siyasi vasitə kimi istifadə olunduğu qeyd edilir.

Politoloq, professor Qabil Hüseynli NOCOMMENT.az-a bildirib ki, Konqresdə ermənipərəst qüvvələrin sayının çoxalması ABŞ-ın Cənubi Qafqaz siyasətində birtərəfli və qərəzli qərarların artması üçün zəmin yarada bilər. Onun sözlərinə görə, Demokratların hər iki palatada üstünlük qazanması və ANCA-nın dəstəklədiyi 57 nəfərin Konqresə daxil olması Azərbaycana təzyiq göstərmək istəyən dairələr üçün imkan yaradır.

Hüseynli hesab edir ki, bu qruplaşma yaxın dövrdə 907-ci düzəlişi yenidən gündəmə gətirməyə, eləcə də Azərbaycanın təhlükəsizlik sahəsində aldığı yardımları tam dayandırmağa çalışacaq. O, həmin dairələrin Azərbaycanın müstəqil siyasətini zəiflətmək, regiondakı sülh prosesini ləngitmək və “humanitar” arqumentlərlə sanksiya təşəbbüslərini təşviq etmək istədiyini deyib. Politoloqun fikrincə, rəsmi Bakının qətiyyətli xarici siyasəti və balanslı mövqeyi bu təzyiqlərin qarşısını ala bilər.