QafqazNews Yeniavaz.com-a istinadən xəbər verir ki, Paraqvay polisi ölkənin keçmiş prezidenti Santyaqo Penyanı “Ueno Bank” işi üzrə saxlayıb. Bankda təxminən 3 milyon müştərinin hesabı dondurulub.
Polis əməliyyatı prokurorluğun orderi əsasında keçirib. Prokurorluq Penyanı səlahiyyətlərindən sui-istifadədə ittiham edir və onun “Ueno Bank” vasitəsilə vəsaitlərin mənimsənilməsində şübhəli olduğunu bildirir.
Saxlanma noyabrın 6-da senatorların Penyanın impiçmentini təsdiqlədiyi vaxt baş verib. Onun vəzifədən uzaqlaşdırılmasını dəstəkləyənlər keçmiş prezidenti bankla bağlı maraqlar toqquşmasında ittiham ediblər.
Məlumata görə, Penya hazırda ev dustaqlığındadır. Dindirilməsinin noyabrın 7-də keçirilməsi nəzərdə tutulur.
Paraqvay Mərkəzi Bankı noyabrın 3-də “Ueno Bank”ı müflis elan edərək oradakı bütün hesabları dondurub. Bankın müştərilərinin sayının təxminən 3 milyon olduğu bildirilir. Paraqvayın əhalisi isə təxminən 7 milyondur.
