QafqazNews Bakupost.az-a istinadən xəbər verir ki, Ermənistanın baş naziri Nikol Paşinyan Azərbaycan Prezidenti İlham Əliyevin şəxsi söhbətlərdə İrəvanın Konstitusiyaya dəyişiklik məsələsini özü həll etmək hüququnu qəbul etdiyini deyib. Bununla yanaşı, Paşinyanın sözlərinə görə, Bakı hazırkı konstitusion müddəalar qüvvədə qaldığı müddətdə sülh sazişi imzalamaq istəmir.
Paşinyan bu barədə “Restart” fondunun təşkil etdiyi “MaskOFF” panel müzakirəsində danışıb. O bildirib ki, Azərbaycanla danışıqlara başlanarkən Konstitusiya məsələsinin Ermənistanın daxili işi olduğu mövqeyi əsas götürülüb.
Baş nazirin sözlərinə görə, İrəvan bu mövzunu xarici tərəf və ya tərəfdaşlarla müzakirə etməyi planlaşdırmır. Qərarın yalnız Ermənistan xalqı ilə aparılan müzakirələr əsasında verilməsi nəzərdə tutulur.
Paşinyan bildirib ki, Əliyev şəxsi söhbətlər zamanı Azərbaycanın bu yanaşmanı qəbul etdiyini təsdiqləyib və Ermənistan tərəfinə Konstitusiyanı dəyişmək barədə birbaşa tələb irəli sürməyib.
Bununla belə, Ermənistan hökumət başçısının iddiasına əsasən, Bakı hazırkı konstitusion müddəalarla sülh sazişini imzalamaq, eləcə də onu Ermənistanla ratifikasiya etmək istəmədiyini bildirib.
Paşinyan qeyd edib ki, bu iki mövqe ilk baxışda oxşar təsir bağışlasa da, aralarında prinsipial fərq mövcuddur. Onun fikrincə, vəziyyət təhlil edilərkən həmin fərq nəzərə alınmalıdır.
