QafqazNews Demokrat.az-a istinadən xəbər verir ki, Nazirlər Kabineti 14 yaşınadək uşaqlar üçün nəzərdə tutulan oyuncaqların təhlükəsizliyinə dair texniki reqlamenti təsdiqləyib. Dövlət Agentliyinin hazırladığı sənəd oyuncaqların insan sağlamlığına, ətraf mühitə və əmlaka vura biləcəyi zərərin riskini azaltmağı, həmçinin istehlakçıların təhlükəsizliklə bağlı yanlış məlumatlanmasının qarşısını almağı hədəfləyir. Qaydalar dərc olunduqdan altı ay sonra qüvvəyə minəcək.
Yeni tələblər tətbiq edilənədək mağazalarda olan məhsullara hansı normaların aid olacağı və bazara nəzarətin necə aparılacağı suallar doğurur.
Antiinhisar və İstehlak Bazarına Nəzarət Dövlət Agentliyinin açıqlamasına görə, “Texniki tənzimləmə haqqında” Qanun qeyri-ərzaq məhsullarına dair məcburi normaların texniki reqlamentlərlə müəyyənləşdirilməsini nəzərdə tutur. Bu sənədlər malların təhlükəsizliyi üzrə normaları ehtiva edən hüquqi aktlardır.
Agentlik bildirib ki, reqlament 2023–2025-ci illər üçün Milli standartlaşdırma sisteminin beynəlxalq tələblərə uyğunlaşdırılması üzrə Dövlət Proqramının icrası çərçivəsində hazırlanıb. Sənəddə oyuncaqların hissiyyatla müəyyən edilən, fiziki-mexaniki və kimyəvi göstəriciləri, alışma ehtimalı və digər təhlükəsizlik meyarları yer alıb.
Qurumun məlumatına əsasən, reqlament qüvvəyə minənədək idxal edilmiş, Azərbaycanda hazırlanıb dövriyyəyə çıxarılmış və hazırda istifadə olunan oyuncaqlar yeni normaların əhatəsinə düşmür. Oyuncaq hesab edilməyən mallara, fərdi sifarişlə hazırlanan nümunələrə və sərgilərdə nümayiş olunan məhsullara da bu tələblər şamil olunmayacaq.
Bununla yanaşı, yeni sənəd qüvvəyə minənə qədər oyuncaqlara, əlaqəli proseslərə və istehsal üsullarına dair mövcud standartlar, eləcə də uyğunluğun qiymətləndirilməsini tənzimləyən hüquqi aktlar qüvvədə qalacaq. Agentlik təsərrüfat subyektlərinin həmin normalara əməl etməli olduğunu vurğulayıb.
Oyuncaq bazarına nəzarət tədbirlərinin “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Qanuna uyğun keçirildiyi bildirilib.
Agentlik xatırladıb ki, yoxlamaların dayandırılmasına dair qanuna əsasən, sahibkarlıq fəaliyyəti üzrə yoxlamalar 2027-ci il yanvarın 1-dək dayandırılıb. Lakin insanların sağlamlığına və həyatına, dövlətin təhlükəsizliyinə və iqtisadi maraqlarına ciddi təhlükə yarandıqda qanunvericiliyin nəzərdə tutduğu yoxlamalar aparıla bilər. Bu tədbirlər səlahiyyətli icra hakimiyyəti orqanının müəyyən etdiyi siyahı və məhdudiyyətlər əsasında həyata keçirilir.
Azad İstehlakçılar Birliyinin sədri Eyyub Hüseynov reqlamentin qəbulunu bazarda təhlükəsiz oyuncaqların satışına şərait yaratmaq baxımından əhəmiyyətli addım sayır. O bildirib ki, Nazirlər Kabinetinin təhlükəsizliyi təmin edilməli olan 100-dən artıq məhsulun siyahısını əhatə edən 343 saylı qərarı 2021-ci ildə ləğv olunana qədər qüvvədə idi. Oyuncaqlar da həmin siyahıya daxil olmuşdu və təhlükəsizlik şərtlərinə cavab verməyən mallar Azərbaycan bazarına buraxılmamalı idi. Hüseynovun sözсünə görə, qərarın ləğvindən sonra bazarda qarışıqlıq yaranıb, təhlükəsizliyi təsdiqlənməmiş müxtəlif məhsullar satışa çıxarılıb.
Birlik rəhbəri qeyd edib ki, sonrakı illərdə malların təhlükəsizliyi ilə bağlı bir sıra texniki reqlamentlər qəbul edilsə də, uşaq oyuncaqları üçün ayrıca tələblərin müəyyənləşdirilməsi xüsusi önəm daşıyır.
Hüseynovun fikrincə, oyuncaqlar həssas yaş qrupuna yönəldiyindən onların hazırlanma materialı və quruluşu diqqətlə nəzərdən keçirilməlidir. Boyadakı ağır metallar sağlamlıq üçün təhlükə yarada, qırılıb ayrılan xırda hissələr isə uşağın qulağına və ya burnuna düşə bilər.
O, oyuncaq alarkən məhsulun qoxusunu yoxlamağı tövsiyə edib. Kəskin, xoşagəlməz plastik iyi olan mağazadan oyuncaq götürməmək məsləhət görülür. Rəngin çıxıb-çıxmadığını anlamaq üçün məhsulu ağ parça ilə silmək, rəng keçərsə isə onu almamaq tövsiyə olunur. Həmçinin asan qopan hissələrin olub-olmadığı yoxlanmalıdır. Gəlincik seçərkən saçlarını yüngül dartıb qopma ehtimalına baxmaq məsləhətdir.
Hüseynov bildirib ki, bu və digər təhlükəsizlik meyarları yeni reqlamentdə nəzərə alınıb. O, tələblərə uyğun olmayan oyuncaqlarla rastlaşan istehlakçıların aidiyyəti dövlət qurumlarına müraciət etməli olduğunu qeyd edib.
