QafqazNews Demokrat.az-a istinadən xəbər verir ki, qış aylarında pəncərə şüşələrinin buğlanması və üzərində damcıların yaranması evlərdə tez-tez rast gəlinən hallardandır. Temperatur fərqi artdıqca bu problem daha qabarıq görünür.
Mətbəxdə istifadə olunan qabyuyan maye şüşələrdə buğulanmanın azalmasına kömək edə bilər. Havadakı su buxarı soyuq səthlə təmasda olduqda kondensasiya yaranır və şüşənin üzərində xırda damcılar toplanır.
Qabyuyan mayedəki səthi aktiv maddələr suyun səthi gərilməsini aşağı salır. Belə olduqda damcılar ayrı-ayrı qalmaq əvəzinə şüşəyə nazik qat kimi yayılır; nəticədə səth daha şəffaf görünür və buğulanma azalır. Bu prinsip eynəklərin buğlanmasına qarşı hazırlanan xüsusi spreylərin təsir mexanizminə bənzəyir.
Məhlul hazırlamaq üçün təxminən bir litr suya bir çay qaşığı qabyuyan maye qatıb qarışdırmaq olar. Qarışığı şüşəyə deyil, mikrofiber parçaya sıxmaq, sonra səthi dairəvi hərəkətlərlə silmək tövsiyə olunur. Sonda şüşəni təmiz və quru parça ilə qurulamaq lazımdır.
Mayeni normadan artıq istifadə etmək ləkə və köpük izləri yarada bilər. Buna görə az miqdarda qarışıq hazırlamaq, həmçinin tərkibində sərt kimyəvi maddələr olmayan adi qabyuyan mayeyə üstünlük vermək məsləhət görülür.