QafqazNews Bakupost.az-a istinadən xəbər verir ki, müğənni Rəqsanə İsmayılovanın 18 yaşlı qızı Yağmurun bədənşəkilləndirmə əməliyyatı keçirməsi estetik müdaxilələrin gənc yaşda mümkün nəticələri ilə bağlı müzakirələri yenidən gündəmə gətirib. Terapevt Rasif Bağırov bu prosedurların hansı risklər yarada biləcəyini izah edib.
Ekspertin sözlərinə görə, Azərbaycanda estetik əməliyyatlara həddən artıq adi yanaşılır. O, bu sahədə Səhiyyə Nazirliyinin qaydalar və tələblər müəyyən etməli olduğunu bildirib. Bağırov vurğulayıb ki, söhbət insan bədəninə tibbi müdaxilədən getdiyinə görə, qərar təkcə pasiyentin istəyinə əsaslanmamalıdır. Pasiyent ehtimal olunan nəticələri dərk etməyə bilər, əməliyyatı icra edən həkimin isə şəxsi maraqları ola bilər. Fəsad yarandıqda tərəflərin bir-birini məsul tutması vəziyyəti daha da çətinləşdirir.
Həkim qeyd edib ki, bədən müəyyən yaşa qədər dəyişməyə davam edir. Buna görə də quruluş tam formalaşıb sabitləşməmiş estetik əməliyyata tələsmək məsləhət görülmür. Onun sözlərinə görə, 18 yaşlı şəxsin bədənində hətta 50 yaşına qədər dəyişikliklər baş verə bilər və bunlar dəriyə, toxumalara təsir göstərərək əvvəlki müdaxilələrin nəticələrini problemə çevirə bilər.
Bağırov bədənşəkilləndirmə, liposaksiya və piy toxumasının götürülməsi ilə bağlı prosedurların dəfələrlə aparılmasının ciddi sağlamlıq təhlükəsi yaratdığını bildirib. O, əməliyyat zamanı tromboemboliya baş verərsə, bunun ölümə səbəb ola biləcəyini söyləyib. Ekspert əlavə edib ki, bəzi müdaxilələrdə bu risk lazımi səviyyədə nəzərə alınmır. Ağır nəticələrin arxasında qanın reoloji xüsusiyyətlərinin pozulması və başqa fizioloji problemlər dayana bilər.
Terapevt hesab edir ki, estetik əməliyyatların mümkün fəsadları televiziya və digər kütləvi informasiya vasitələrində geniş izah edilməlidir. O, prosedurlar üçün konkret tibbi meyarların hazırlanmasını, yalnız bu meyarlara uyğun şəxslərə əməliyyat aparılmasına icazə verilməsini təklif edib. Bağırovun fikrincə, həkim əməliyyatın tibbi zərurətini əsaslandırmalı, bu əsaslandırma isə xüsusi komissiya və ya müvafiq qurum tərəfindən yoxlanılmalıdır.
Ekspertin sözlərinə görə, estetik əməliyyatların çoxalması bəzi insanların öz təbii görünüşündən narazı qalmasına da səbəb olur. O, burun quruluşu normal olan şəxslərin belə ətrafdakı nümunələrə görə onu kompleks hesab etməyə başladığını bildirib. Həkimin vicdanına güvənmək kifayət etmədiyini deyən Bağırov, müdaxilənin səbəbi sənədləşdirilməli və nəzarət altında olmalı olduğunu vurğulayıb.
Bağırov 18 yaşına çatmamış şəxslərə tibbi göstəriş olmadan estetik əməliyyat edilməsini yolverilməz sayır. O, burun çəpərinin əyriliyi tənəffüs çətinliyi yaradırsa, əməliyyatın tibbi ehtiyac əsasında aparıla biləcəyini, bunun isə estetik müdaxilə sayılmadığını qeyd edib. Görünüşü dəyişmək məqsədli prosedurların yetkinlik yaşına çatmayanlara tətbiqinin qarşısının alınmalı olduğunu bildirib.
Ekspert gənc yaşda bədən quruluşunun dəyişməyə davam etdiyini, hamiləlik zamanı isə qadının qarın nahiyəsində və dərisində ciddi dəyişikliklərin yarana biləcəyini xatırladıb. Əvvəlki əməliyyatların bu prosesə təsir edərək əlavə fəsadlara yol aça biləcəyini deyən Bağırov, Azərbaycanda vahid tibbi meyarlar və ciddi nəzarət mexanizminin yaradılmasının vacibliyini vurğulayıb.
