QafqazNews Demokrat.az-a istinadən xəbər verir ki, noyabrın 17-dən Azərbaycanda internetin kəsiləcəyi və bank hesablarındakı pulların silinəcəyi barədə yayılan iddialar təsdiqini tapmayıb. Sosial şəbəkələrdə qlobal internetin üç ay ərzində dayandırılacağı da irəli sürülür.
Bu şayiələrin yayılmasına ABŞ-da həmin gün keçirilməsi nəzərdə tutulan fövqəladə xəbərdarlıq sisteminin sınağı ilə bağlı məlumatların səbəb olduğu bildirilir. Paylaşımlarda sınaq qlobal internetin bağlanması, bank sistemlərinə kiberhücum və hesab qalıqlarının sıfırlanması kimi təqdim edilir. ABŞ-ın rəsmi qurumları isə belə bir plan elan etməyib.
İddialara görə, hakerlər internetə bağlı sistemləri sıradan çıxaracaq, bank hesablarında qalıqlar sıfır görünəcək, daha sonra isə süni intellekt sistemlərinin təhlükəsizlik boşluqlarını aradan qaldırmaq üçün internet dünya üzrə üç ay bağlanacaq. Bu ssenarini təsdiqləyən yoxlanıla bilən texniki məlumat yoxdur.
ABŞ Federal Rabitə Komissiyasının (FCC) rəsmi bildirişində qeyd olunur ki, noyabrın 17-də Federal Fövqəladə Halların İdarə Olunması Agentliyi (FEMA) ilə birgə ölkə üzrə Fövqəladə Xəbərdarlıq Sisteminin (EAS) sınağı aparılacaq.
Yoxlamanın məqsədi radio, televiziya, kabel və peyk yayımçıları vasitəsilə fövqəladə xəbərdarlıqların əhaliyə çatdırılmasını sınaqdan keçirməkdir. Bu tədbir internet və bank sistemlərinin fəaliyyətinin dayandırılmasını nəzərdə tutmur. Sınaq zamanı radio və televiziya proqramlarında təxminən bir dəqiqəlik fasilə ola bilər; mobil telefonlara xəbərdarlıq göndərilməsi isə yoxlamaya daxil deyil.
Internet Society təşkilatının məlumatına görə, qlobal internet şirkətlərin, dövlət qurumlarının, universitetlərin və provayderlərin idarə etdiyi on minlərlə müstəqil şəbəkənin birləşməsidir. İnternetin vahid idarəetmə mərkəzi yoxdur. Buna görə də onun bütövlükdə bir qərarla üç ay müddətinə söndürülməsi barədə iddia mövcud quruluşla uzlaşmır.
Ukraynanın Dezinformasiyaya Qarşı Mübarizə Mərkəzi də noyabrın 17-də bank hesablarının sıfırlanacağı və internetin üç ay kəsiləcəyi barədə məlumatları əsassız sayıb. Mərkəzin açıqlamasına əsasən, paylaşımlarda yer alan fövqəladə hallara hazırlıq tövsiyələrinin həmin tarixə və iddia olunan kiberhücuma aidiyyəti yoxdur.
Beləliklə, noyabrın 17-də internetin qlobal miqyasda dayandırılacağı, banklardakı vəsaitlərin silinəcəyi və insanların üç ay nağd pulla yaşayacağı barədə məlumatlar təsdiqlənmir. Bu iddialar ABŞ-da planlaşdırılan texniki sınaqla bağlı məlumatların təhrif olunmuş şəkildə yayılmasına əsaslanır.