QafqazNews Patrulaz.az-a istinadən xəbər verir ki, Milli Məclisin deputatı Azər Badamov 8 Noyabr – Zəfər Günü ilə bağlı fikirlərini bölüşüb. O bildirib ki, bu tarix xalqın milli qürurunu, birliyini və iradəsini əks etdirir, qələbə isə şəhidlərin canı, qazilərin sağlamlığı, əsgər və zabitlərin qəhrəmanlığı bahasına qazanılıb.
Deputatın sözlərinə görə, 2020-ci ildəki 44 günlük Vətən müharibəsi Azərbaycan xalqının gücünü və əzmini dünyaya göstərib. İlham Əliyevin rəhbərliyi, siyasi və hərbi strategiyası, ordunun rəşadəti və xalqın birliyi nəticəsində torpaqların təxminən 30 il davam edən işğalına son qoyulub. Şuşanın azad edilməsi isə Qələbənin ən parlaq məqamlarından biri olub.
Badamov qeyd edib ki, Azərbaycan artıq altı ildir 8 Noyabrı qalib xalq kimi qeyd edir. Onun fikrincə, bu tarix hərbi qələbənin ildönümü olmaqla yanaşı, milli ləyaqətin, dövlət gücünün və tarixi ədalətin bərpasının rəmzidir.
Deputat Zəfərin davamının azad edilmiş ərazilərdə aparılan genişmiqyaslı quruculuq və bərpa işlərində təzahür etdiyini vurğulayıb. Qarabağ və Şərqi Zəngəzurda yollar, yaşayış kompleksləri, məktəblər, xəstəxanalar və digər sosial infrastruktur obyektləri tikilir. Uzun illər yurd həsrəti çəkən keçmiş məcburi köçkünlərin mərhələli şəkildə doğma torpaqlarına qayıdaraq evlərində yeni həyata başlaması da xüsusi sevinc və qürur doğurur.
Badamovun sözlərinə görə, Qarabağda həyat yenidən canlanır, doğma yurd yerlərinə və evlərə sevinc qayıdır. O, Böyük Qayıdış prosesini Zəfərin quruculuq mərhələsinin mühüm nəticələrindən biri kimi dəyərləndirib.
Deputat Zəfər Günü münasibətilə təbriklərini çatdırıb, Vətən uğrunda həlak olanların xatirəsini ehtiramla yad edib və qazilərə cansağlığı arzulayıb. O, üçrəngli bayrağın azad və suveren Azərbaycanın səmasında daim dalğalanmasını diləyib.
