QafqazNews Demokrat.az-a istinadən xəbər verir ki, Hindistanda insanların ovuclarını bir araya gətirib başlarını azca əyməklə salamlaşması qədim ənənələrdəndir. “Namaste” deyilən bu jest adi nəzakət qaydasından əlavə, hörmət ifadəsi kimi də qəbul olunur.
Sanskrit mənşəli “namaste” sözü təxminən “Sizə hörmətlə baş əyirəm” anlamına gəlir. Bu salam hinduizm, buddizm və caynizm ənənələrində yer alır. Adətən böyüklərə, müəllimlərə, qonaqlara və ehtiram göstərilən insanlara bu şəkildə müraciət edilir.
Əlləri sinə önündə birləşdirmək “Anjali Mudra” adlanır. Jest hörmət və ehtiramla yanaşı, mənəvi bağlılığı da simvolizə edir.
“Namaste” bəzi hallarda təşəkkür bildirmək üçün də işlədilir. Qərb ölkələrində bu ifadəyə daha çox yoqa məşğələlərinin sonunda rast gəlinir. Bununla belə, ənənəvi istifadədə sözün əsas funksiyası vidalaşmaq yox, görüş zamanı salam verməkdir.