QafqazNews Bakupost.az-a istinadən xəbər verir ki, Azərbaycanda bəzi vətəndaşların əməkhaqlarına vergi güzəştləri tətbiq olunur. Bu tədbirlərin məqsədi gəlirləri artırmaq və sosial rifahı yüksəltməklə yanaşı, müəyyən iqtisadi fəaliyyətləri stimullaşdırmaqdır.
İqtisadçı Xalid Kərimli Demokrat.az-a açıqlamasında bildirib ki, güzəştlər ayrı-ayrı qruplara müxtəlif səbəblərlə verilir. Bu kateqoriyalara dövlət və cəmiyyət qarşısında xüsusi xidmətləri olan şəxslər, eləcə də sosial baxımdan həssas təbəqələr daxildir.
Kərimlinin sözlərinə görə, şəhid ailələri və məcburi köçkünlər üçün müəyyən vergi güzəştləri nəzərdə tutulub. Həmçinin bəzi dövlət qurumlarında çalışan və dövlət üçün mühüm fəaliyyət göstərən şəxslərin əməkhaqları da bu güzəştlərdən yararlana bilər.
Ekspert qeyd edib ki, belə tədbirlər sosial ədaləti qorumağa, həssas qruplara dəstək verməyə və dövlətin müəyyən kateqoriyalara minnətdarlığını göstərməyə xidmət edir. Bununla yanaşı, güzəşt tətbiq ediləndə dövlət həmin vergiləri toplamaq imkanından imtina etdiyinə görə büdcə gəlirləri də təsirlənir.
İqtisadçı stimullaşdırıcı xarakter daşıyan güzəştlərin də olduğunu vurğulayıb. Məsələn, əvvəlki dövrdə uzunmüddətli depozitlərdən əldə edilən gəlirlərin vergidən azad olunması əhalini banklarda uzun müddətə əmanət yerləşdirməyə təşviq etmək məqsədi daşıyıb.
Hibrid və elektrik mühərrikli avtomobillərə tətbiq olunan vergi güzəştləri isə ənənəvi mühərrikli nəqliyyat vasitələri əvəzinə daha ekoloji avtomobillərin seçilməsini təşviq etməyə yönəlib. Kərimlinin bildirdiyinə görə, bu cür güzəştlər müəyyən müddət üçün qüvvədə olur və həmin dövr bitdikdə dayandırıla bilər.