QafqazNews Bakupost.az-a istinadən xəbər verir ki, Çində müəllimlikdən biznesə keçən Maykl Mayın qurduğu “Crown New Materials Technology” şirkəti birjaya çıxandan sonra onu milyarderlər sırasına yüksəldib. Şençjen Fond Birjasında ticarətə başlayan müəssisənin səhmləri ilk gündə 787 faizə qədər bahalaşıb.
Səhmlər ilkin olaraq 16,98 yuan qiymətlə təklif edilib. Ticarət sessiyası ərzində onların dəyəri 150,58 yuana çatıb ki, bu da təxminən 8,9 qat artım deməkdir. Növbəti ticarət günündə isə qiymət 77 yuanadək enib. Şirkət rəhbərliyi bu dalğalanmalara görə investorları ehtiyatlı davranmağa və qərarlarını diqqətlə nəzərdən keçirməyə çağırıb.
“Forbes”un hesablamasına görə, 62 yaşlı Maykl Mayın səhmlərinin dəyəri ilk ticarət günü 2,5 milyard dollara yüksəlib. Şirkətin sədr müavini olan 64 yaşlı bacısı May Huixianın sərvəti isə 2 milyard dollar həcmində qiymətləndirilib. Avstraliya vətəndaşları olan və Honkonqda yaşayan bacı-qardaşın sərvət hesablaması nağd gəlirə deyil, sahib olduqları səhmlərin bazar dəyərinə əsaslanır.
Maykl May 1984-cü ildə müəllimlikdən ayrılıb. Sonrakı 15 il ərzində müxtəlif fabrik və müəssisələrdə işlədikdən sonra 2000-ci ildə bacısı ilə birlikdə şirkəti yaradıb. Baş ofisi Çunşan şəhərində yerləşən istehsalçı elektronika, avtomobil və yarımkeçirici sahələrində istifadə edilən yapışdırıcı və qoruyucu materialların əsas təchizatçılarındandır.
Şirkətin Çində dörd, Vyetnamda bir istehsal müəssisəsi var və o, “Tesla” ilə “Apple”ın təchizat zəncirində təmsil olunur. IPO-dan əldə ediləcək vəsait istehsal imkanlarının genişləndirilməsinə və yeni tədqiqat mərkəzinin yaradılmasına sərf ediləcək.
Şirkətin səhmlərinin artımı Çin bazarlarının gerilədiyi vaxta təsadüf edib. İstehlakın zəifliyi və süni intellekt sektorundakı risklər fonunda əsas indekslərdən bəziləri iyun pikindən 20 faizdən çox düşüb. Bazarları dəstəkləmək üçün Pekin hökuməti birja ticarət fondlarına 19 milyard dollar ayırıb. Buna baxmayaraq, yeni listinqə alınan şirkətə tələbat investor marağının davam etdiyini göstərib.
