QafqazNews Nocomment.az-a istinadən xəbər verir ki, deputat Vüqar Bayramov Azərbaycanın Vyetnamla ticarət əlaqələri barədə məlumat verib. O bildirib ki, Prezident İlham Əliyev Vyetnama rəsmi səfərdədir və səfərdən əvvəl Vyetnam Xəbər Agentliyinə müsahibəsində iki ölkə arasında iqtisadi-ticari münasibətlərin davamlı inkişaf etdiyini vurğulayıb.

Bayramovun sözlərinə görə, 2026-cı ilin yanvar-sentyabr aylarında Azərbaycanla Vyetnam arasındakı ticarət dövriyyəsi 136 milyon dollar təşkil edib. Bunun 134,9 milyon dolları Vyetnamdan idxalın payına düşüb. Həmin dövrdə iki ölkə 641 adda məhsulla ticarət aparıb.

İlin ilk doqquz ayında Azərbaycana Vyetnamdan 188 min 684 smartfon gətirilib və bu məhsullara görə Vyetnam şirkətlərinə 73 milyon dollar ödənilib. İdxalda əsas yeri texnika və avadanlıqlar tutub.

Vyetnamdan Azərbaycana 4,9 milyon dollarlıq məlumatların qəbulu, çevrilməsi, ötürülməsi və bərpası üçün maşınlar, o cümlədən kommutasiya qurğuları, 4,6 milyon dollarlıq portativ hesablama maşınları və 2,9 milyon dollarlıq tozsoranlar idxal olunub. Məlumatların emalı üçün rəqəm blokları, yaddaş və giriş-çıxış qurğularının dəyəri 2,5 milyon dollar, elektron modullarınkı 2,4 milyon dollar olub.

Siyahıda, həmçinin 2,2 milyon dollarlıq qulaqcıq və baş telefonları dəstləri, 2 milyon dollarlıq keşyu fındığı, hər biri 1,4 milyon dollar olmaqla printer, surətçıxarma və faks aparatları, eləcə də Piper növlü doğranmamış və döyülməmiş istiot yer alıb. Tekstil üstlü, rezin və ya plastmas altlıqlı ayaqqabıların idxalı 1,3 milyon dollar, statik dəyişdiricilərin idxalı isə 1,1 milyon dollar təşkil edib.

Bundan başqa, ölkəyə 1 milyon dollarlıq hesablama maşınlarının yaddaş qurğuları, 959 min dollarlıq böyük tutumlu paltaryuyan maşınlar, 835 min dollarlıq qablaşdırılmış dərman vasitələri və 782 min dollarlıq dondurulmuş naqqa balığı gətirilib. Digər məhsullar da idxal olunub.

Deputat qeyd edib ki, həmin müddətdə Azərbaycanın Vyetnama ixracının 90 faizdən çoxunu tütün təşkil edib və bu məhsul üzrə ixrac 1 milyon dollar olub. Qalan ixrac mallarının dəyəri daha kiçik rəqəmlərlə ifadə olunur. Bayramov iki ölkə arasında ticarətin genişlənməsi üçün böyük imkanlar olduğunu bildirib və Prezidentin səfərinin iqtisadi əməkdaşlığa təkan verəcəyini gözlədiyini qeyd edib.