QafqazNews Bakupost.az-a istinadən xəbər verir ki, Özbəkistan Prezidenti Şavkat Mirziyoyev Azərbaycan Prezidenti İlham Əliyevə Zəfər Günü münasibətilə təbrik məktubu ünvanlayıb.
Məktubda Mirziyoyev Əliyevə və Azərbaycan xalqına səmimi təbriklərini çatdırıb, ölkənin bayramı münasibətilə xoş arzularını ifadə edib.
Özbəkistan Prezidenti Azərbaycanın tarixi ədaləti bərpa etməsini və ərazi bütövlüyünü təmin etməsini altı il əvvəl xalqın çoxəsrlik arzu və istəklərinin gerçəkləşməsi kimi qiymətləndirib. O, bu nəticəni İlham Əliyevin ardıcıl siyasəti və rəhbərliyi, eləcə də Vətənin taleyi naminə fədakarlığı ilə əlaqələndirib.
Mirziyoyev yazıb ki, siyasi, diplomatik və hərbi imkanların ümumi məqsəd naminə birləşdirilməsi, Azərbaycan xalqının qəhrəmanlığı və mətanəti Qələbənin əldə olunmasında mühüm rol oynayıb. Onun fikrincə, bayram sülh, sabitlik və tərəqqinin möhkəmlənməsinə, yeni nəslin vətənpərvərlik və milli dəyərlərə hörmət ruhunda yetişməsinə töhfə verəcək.
Məktubda bu il Bakı, Daşkənd və Buxarada keçirilən görüşlər və danışıqlar, həmçinin əldə olunan razılaşmaların ikitərəfli münasibətlərdə yeni mərhələ açdığı qeyd olunub. Əbədi Dostluq haqqında Müqavilənin imzalanması isə strateji tərəfdaşlıq və müttəfiqliyin daha yüksək səviyyəyə qaldırılması istiqamətində əməli addım kimi dəyərləndirilib.
Mirziyoyev birgə səylərlə qarşılıqlı faydalı və uzunmüddətli əlaqələrin xalqların rifahı naminə, mövcud potensiala uyğun şəkildə dərinləşəcəyinə əmin olduğunu bildirib. O, İlham Əliyevə cansağlığı, ailə səadəti və dövlət fəaliyyətində uğurlar, Azərbaycan xalqına isə sülh, firavanlıq və davamlı tərəqqi arzulayıb.
