QafqazNews Bakupost.az-a istinadən xəbər verir ki, qadın voleybolçulardan ibarət “Turan” sabah Çempionlar Liqasının üçüncü təsnifat mərhələsində Bolqarıstanın “Maritsa” komandasını qəbul edəcək.

Klub prezidenti Həsən Zeynalov və baş məşqçi Ziya Rəcəbov bu gün keçirilən brifinqdə jurnalistlərin suallarını cavablandırıblar.

Zeynalov bildirib ki, qrup mərhələsinə vəsiqə qazanmağa görə klub pul mükafatı almayacaq, əksinə, ödəniş etməli olacaq. Onun sözlərinə görə, bu mərhələyə yüksəlmək “Turan”ın Avropada tanınmasına imkan verəcək. Prezident komandanın heyətinin tam formalaşdırıldığını deyib.

Motivasiya mənbəyinin azarkeşlər olduğunu söyləyən Zeynalov qeyd edib ki, oyuna saxta biletlə gəlmək istəyənlər də olub. O, Tovuzda futbola marağın daha böyük olduğunu vurğulayıb və klubun futbolda düzgün istiqamətdə irəlilədiyini bildirib: “Bir gün bu səviyyədə çıxış edəcəyik”.

Prezident iki cəbhədə mübarizənin voleybolçuların fiziki durumuna mane olmadığını, əsas məqsədin zədələrdən yayınmaq olduğunu söyləyib. Qrup mərhələsində 16 il sonra iştirakla bağlı həyəcan barədə sualı cavablandıran Zeynalov komandanın dəstək gördüyünü deyib. O, oyun ərəfəsində təşkilati məsələlərlə məşğul olduğuna görə həyəcanının az olduğunu, əsas hisslərin oyun günü yarandığını bildirib və Ziya Rəcəbovla uğurlu nəticələrə ümid etdiyini qeyd edib.

Baş məşqçi komandanın rahatlığa yol verməyəcəyini deyib. Onun sözlərinə görə, səfər qələbəsindən sonra təcrübə baxımından yaxşı vəziyyətdədirlər. Rəcəbov saat fərqinin və oyunçuların uzun yol qət etməsinin təsir göstərdiyini, buna görə doğma meydanda bütün güclərini ortaya qoymalı olduqlarını söyləyib.

Məşqçi heyətin durumunu yaxşı qiymətləndirib. Komandada bir zədəli voleybolçu olduğunu və onun bir aya sağalacağını bildirən Rəcəbov alternativlərin mövcudluğunu da qeyd edib. Ayşənin Bolqarıstandakı görüşdə oynamamasını isə taktiki qərarla izah edib.

Rəqibin səfərdə daha aqressiv oynadığını deyən baş məşqçi, “Maritsa”nın əvvəlki rəqiblə keçirdiyi səfər matçında daha yaxşı təsir bağışladığını xatırladıb. O, hər iki komandanın uzun yol gəldiyini, “Turan”ın Tovuza qayıtmadan Avropada qaldığını və bolqarıstanlı voleybolçuların boyca üstün olduğunu bildirib.

Rəcəbov rəqibin istədiyinə nail olmasının mümkünlüyünü istisna etməyib: “Hər şey baş verə bilər. Əlimizdən gələni etməyə çalışacağıq. Hər bir halda onlar hazırdırlar”.