QafqazNews Demokrat.az-a istinadən xəbər verir ki, Azad İstehlakçılar Birliyinin sədri Eyyub Hüseynov yerli məhsullara inamın artırılması üçün gömrük rüsumlarını yüksəltməyin yetərli olmadığını bildirib. Onun sözlərinə görə, istehsalçıların keyfiyyətə, qiymətə və istehlakçıların tələblərinə diqqət yetirməsi, dövlətin isə bu sahəyə dəstək verməsi vacibdir.

Hüseynov qeyd edib ki, istehlakçıların yerli mallara münasibətinə keçmiş təcrübələr və bazarda müşahidə olunan hallar təsir göstərir. O, istehlakçı hüquqlarının müdafiəsi haqqında qanunun 1995-ci ildə qəbul olunduğunu və o vaxtdan yenilənmədiyini xatırladıb. Həmin müddətdə bazarın dəyişdiyini, onlayn ticarətin yarandığını vurğulayan birlik sədri dövlət qurumlarının istehlakçı maraqlarını nəzərə almalı olduğunu deyib.

Onun fikrincə, yerli məhsullara marağı yalnız reklamla artırmaq mümkün deyil. İstehsalçılar real məhsullarla istehlakçıların etimadını qazanmalı, media və istehlakçı təşkilatları ilə əməkdaşlıq qurmalıdırlar. Hüseynov bildirib ki, bəzi istehlakçılar ikinci əl xarici mallara üz tutur və ya xaricdən gətirilən məhsullara üstünlük verirlər. Bu seçim isə xarici malların mütləq daha keyfiyyətli olması anlamına gəlmir.

Birlik sədri böyük yarmarkalarda yerli istehsal olan geyim və ayaqqabıların üzərinə xarici markalar vurulduğunu müşahidə etdiyini söyləyib. İstehlakçıların həmin məhsulları geyinsələr də, xarici markalara daha çox rəğbət göstərdiklərini qeyd edən Hüseynov sahibkarların istehlakçılar, onların təşkilatları və media ilə sıx əlaqədə çalışmasının vacibliyini vurğulayıb.

“Sədərək bazarına yolum düşəndə dünya başıma fırlanır. Özümü çox pis hiss edirəm. Baxıram ki, demək olar, Azərbaycan istehsalı olan məhsul yoxdur”, – deyə Hüseynov bildirib. O, yerli məhsulların qiymət baxımından xarici mallarla rəqabətdə çətinlik çəkdiyini söyləyib və Türkiyənin yüngül sənayedə əldə etdiyi irəliləyişi nümunə göstərib.

Hüseynov yerli istehsalın inkişafı üçün dizaynerlərin yetişdirilməsinə, istehlakçıların rəğbətini qazanan biznes qurumlarının yaranmasına ehtiyac olduğunu deyib. Azad İstehlakçılar Birliyinin belə təşəbbüslərə təmənnasız yardım etməyə hazır olduğunu bildirib. Onun sözlərinə görə, dövlət də istehsalçılara dəstək verməli, vergiləri minimuma endirməli və məhsul istehsalına marağı artıran şərait yaratmalıdır. Hüseynov, həmçinin avtomobillərin dövlət nömrə nişanlarının da xaricdə istehsal edildiyi barədə məlumatı olduğunu qeyd edib.

Birlik sədri Azərbaycanda vaxtilə mövcud olan toxuculuq və ipəkçilik sahələrinin zəiflədiyini, dəri sənayesində də vəziyyətin qənaətbəxş olmadığını vurğulayıb. O bildirib ki, ölkədən dəri ixrac edilir, eyni zamanda fermerlər saxlamağa yer tapmadıqları üçün qoyun yununu yandırırlar. Hüseynov yerli, qaba yunun emal edilərək xaricə göndərilməsi ilə bağlı ideyası olduğunu, lakin məhsulun adını hələlik açıqlamadığını deyib.

O, Sabirabad rayonunda yaşamış və təxminən 40 gün əvvəl vəfat etmiş Səkinə adlı qohumunun həyətində limon, mandarin, banan və başqa xarici meyvələri yetişdirdiyini də danışıb. Hüseynov bu nümunəni xatırladaraq, ölkədə çoxlu təhsilli aqronom olduğu halda, onların belə nəticə əldə edib-etmədiyini sual edib.