QafqazNews Baku.ws-a istinadən xəbər verir ki, Azərbaycanda 2025-ci ildə işsizlikdən sığorta ödənişi təyin olunan vətəndaşlara nəzərdə tutulan vəsait tam çatmayıb. Həssas qrupların məşğulluğuna yönəldilən bəzi tədbirlər üçün 2026-cı ildə ayrılmış məbləğin də böyük qisminin xərclənməyəcəyi gözlənilir.

Bu məlumatlar Hesablama Palatasının İşsizlikdən Sığorta Fondunun 2027-ci il büdcə layihəsi barədə rəyində yer alıb.

Palatanın sənədində bildirilir ki, əvvəlki rəydə sığorta ödənişi alacaq şəxslərin sayı və bunun üçün tələb olunan maliyyə üzrə artım proqnozlarının bir-birinə uyğun olmadığı qeyd edilib. Bu iradlar nəzərə alınmadığından 2025-ci ildə hesablanmış ödənişlərdən daha az vəsait sərf olunub. Rəsmi hesabatlarda həmin il üçün nəzərdə tutulan 17 milyon manatın hamısının icra edildiyi göstərilsə də, bu məbləğ təyin olunmuş ödənişləri tam təmin etməyib.

İl ərzində fondun büdcəsinə yenidən baxılmaması nəticəsində vətəndaşlara ödənişlərin hamısı verilməyib. Hesablama Palatasının rəyi ödənilməmiş vəsaitin məbləği və bundan təsirlənən insanların sayı barədə məlumat vermir.

Həssas qrupların məşğulluğunu dəstəkləyən bir sıra tədbirlərdə də icra səviyyəsi aşağı olub. 2026-cı ildə kvotadan artıq iş yerlərinin açılması, sosial müəssisələr və məqsədli proqramlar, eləcə də başqa aktiv məşğulluq tədbirləri üçün ümumilikdə 4 milyon manat ayrılıb.

Doqquz ayda bu xərclər üzrə 400 min manat istifadə edilib ki, bu da illik məbləğin 10 faizidir. İlin sonuna qədər xərclərin 1,4 milyon manata, yəni ayrılmış vəsaitin 35 faizinə çatacağı proqnozlaşdırılır. Belə olan halda 2,6 milyon manat istifadə edilməmiş qalacaq.

Ən aşağı icra sosial müdafiəyə ehtiyacı olan və iş tapmaqda çətinlik çəkən şəxslər üçün kvotadan əlavə iş yerlərinin yaradılması istiqamətində qeydə alınıb. Bu məqsədlə ayrılan 1 milyon manatın doqquz ay ərzində cəmi 8 min manatı xərclənib. İlin sonunadək 25 min manatın istifadə olunacağı gözlənilir ki, bu, illik təyinatın 2,5 faizidir. Həmin sahəyə 2025-ci ildə ayrılan vəsait də xərclənməyib.

Buna rəğmən, 2027-ci ildə əlavə iş yerlərinin yaradılması üçün yenidən 1 milyon manat ayrılması nəzərdə tutulur. Sosial müəssisələrə və məqsədli proqramlara 2 milyon, digər aktiv məşğulluq tədbirlərinə isə 1 milyon manat planlaşdırılıb. Bu istiqamətlər üzrə ümumi büdcə 4 milyon manat olaraq qalır.

Hesablama Palatası əvvəlki illərdə də müşahidə edilən aşağı icranı nəzərə alaraq, vəsaitlərin daha əsaslı planlaşdırılması və istifadəsi üçün mexanizmlərin təkmilləşdirilməsini vacib sayır. Qurum, həmçinin işsizlikdən sığorta ödənişlərinə ayrılan məbləğin faktiki tələbatla uzlaşdırılmasının əhəmiyyətini vurğulayır.