QafqazNews Konkret.az-a istinadən xəbər verir ki, Respublika Perinatal Mərkəzinin binası iki ildən çoxdur fəaliyyət göstərmir və hazırda baxımsız vəziyyətdədir. Müəssisə əvvəllər minlərlə ailəyə xidmət edib.
Mərkəzin uzun illər ərzində ginekoloq, neonatoloq və reanimatoloqlardan, eləcə də təcrübəli tibb bacılarından ibarət ixtisaslı heyət formalaşdırdığı bildirilir. Fəaliyyətin uzun müddət dayanması qurumun gələcəyi ilə bağlı qeyri-müəyyənlik yaradıb.
Bu il binada təmir aparılacağı gözlənilsə də, indiyədək əsaslı işlərə başlanmayıb. Çəkiliş zamanı girişdən görünən daxili sahələrdə tozlu oturacaqlar və istifadə olunmayan dəhlizlər qeydə alınıb.
Ərazidə işləyən şəxslərin verdiyi məlumata əsasən, hazırda yalnız birinci mərtəbədə yerləşən şöbələrdən birinin fəaliyyəti bərpa edilib. Mərkəzin inzibati bölməsi də həmin mərtəbədə yerləşir.
Binanın təmiri və Mərkəzin gələcək fəaliyyəti barədə Səhiyyə Nazirliyi ilə TƏBİB-ə sorğu göndərilib. Hər iki qurum müəssisənin sonrakı taleyi barədə məlumatlarının olmadığını bildirib.
Beləliklə, minlərlə ailəyə xidmət göstərmiş Respublika Perinatal Mərkəzinin nə vaxt tam fəaliyyətə başlayacağı hələ də açıqlanmayıb.