QafqazNews Manset.az-a istinadən xəbər verir ki, Yeni Azərbaycan Partiyasının (YAP) təsis olunması müstəqilliyin ilk illərində ölkədə yaşanan siyasi, iqtisadi və ictimai çətinliklər fonunda dövlətçilik ideyalarının qorunması, sabitliyin təmin edilməsi və inkişaf istiqamətlərinin müəyyənləşdirilməsi baxımından mühüm hadisə olub.
1990-cı illərin əvvəlindəki mürəkkəb şəraitdə partiyanın yaradılması cəmiyyətdə sabitlik, milli birlik, güclü dövlətçilik və peşəkar idarəçilik tələbatını ifadə edirdi. YAP-ın siyasi səhnəyə çıxması dövlətçilik maraqlarının müdafiəsinə və ölkənin gələcək yolunun müəyyənləşməsinə töhfə verdi.
Azərbaycan 1991-ci ildə müstəqilliyini bərpa etdikdən sonra siyasi qeyri-sabitlik, idarəetmə problemləri, iqtisadi geriləmə və sosial çətinliklərlə üzləşdi. Ermənistanın hərbi təcavüzü və ölkə ərazilərinin bir hissəsinin işğalı da müstəqilliyi ciddi təhlükə altına salmışdı. Bu dövrdə cəmiyyət sabitliyin bərqərar olmasını, idarəçiliyin möhkəmlənməsini, milli maraqların və ərazi bütövlüyünün qorunmasını, davamlı inkişafı gözləyirdi.
Belə bir vaxtda dövlətçilik təcrübəsi və idarəçilik bacarığı ilə tanınan Ümummilli Lider Heydər Əliyevin ictimai-siyasi həyata qayıtmasına geniş ehtiyac yaranmışdı. Azərbaycanın müxtəlif bölgələrindən olan ziyalılar, ictimai-siyasi xadimlər və vətəndaşlar ona müraciət edərək ölkənin gələcəyi naminə yeni siyasi təşkilat yaratmağı təklif etdilər. Təşəbbüsün hədəfləri müstəqilliyi möhkəmləndirmək, dövlətçiliyi qorumaq, siyasi həmrəylik və sabitlik yaratmaq idi.
1992-ci il oktyabrın 16-da müxtəlif sahələri təmsil edən 91 ziyalı Heydər Əliyevə məktubla müraciət edərək yeni partiyanın qurulmasına rəhbərlik etməsini istədi. “91-lər”in müraciəti kimi tanınan sənəddə ölkədəki ağır vəziyyət, müstəqilliyin və milli maraqların qorunması, sabitliyin təmin olunması, demokratik dövlət quruculuğunun irəlilədilməsi zərurəti vurğulanırdı.
Heydər Əliyev oktyabrın 24-də müraciətə cavab verərək yeni partiyanın yaradılması təşəbbüsünə dəstək verdi. O, belə bir təşkilatlanmanı tarixi zərurət kimi qiymətləndirdi və onun Azərbaycanın demokratik inkişafı, suverenliyinin müdafiəsi, xalqın rifahının yüksəldilməsi üçün əhəmiyyətini qeyd etdi.
YAP-ın təsis konfransı 1992-ci il noyabrın 21-də Naxçıvan şəhərində, Cəlil Məmmədquluzadə adına Naxçıvan Dövlət Dram Teatrının binasında keçirildi. Toplantı yeni təşkilatın yaradılması ilə yanaşı, dövlətçilik ideyalarının qorunması və müstəqilliyin möhkəmləndirilməsi baxımından da əlamətdar hadisə oldu.
Konfransda partiyanın təsis edilməsi barədə qərar qəbul olundu, Proqram və Nizamnamə təsdiqləndi, rəhbər qurumlar yaradıldı, Siyasi Şura və İdarə Heyəti seçildi. İştirakçılar Heydər Əliyevi yekdilliklə YAP-ın sədri seçdilər. Onun dövlətçilik təcrübəsi, siyasi nüfuzu və idarəçilik bacarığı partiyanın cəmiyyətdə mövqe qazanmasına şərait yaratdı.
YAP-ın yaranması müstəqil Azərbaycanın siyasi həyatında yeni mərhələnin başlanğıcı oldu. Təşkilatın əsas prinsipləri dövlət müstəqilliyinin və milli maraqların müdafiəsi, azərbaycançılıq ideologiyasının inkişafı, demokratik dəyərlərin möhkəmləndirilməsi və hüquqi dövlət quruculuğu idi. Siyasi xəttdə milli birlik, iqtisadi inkişaf, sosial rifah, milli-mənəvi dəyərlərin qorunması və müasir dövlət quruculuğu da önəmli yer tuturdu.
1993-cü ildə ölkədə böhran dərinləşdi, vətəndaş qarşıdurması təhlükəsi artdı və dövlət müstəqilliyinin gələcəyi sınaq qarşısında qaldı. Xalqın çağırışı ilə Heydər Əliyev həmin il iyunun 9-da Bakıya qayıtdı. İyunun 15-də Azərbaycan Respublikası Ali Sovetinin Sədri seçilməsi siyasi tarixdə yeni mərhələnin başlanmasına yol açdı.
Oktyabrın 3-də keçirilən prezident seçkilərində Heydər Əliyevin dövlət başçısı seçilməsindən sonra idarəçiliyin möhkəmləndirilməsi, sabitliyin təmin olunması və genişmiqyaslı islahatların aparılması istiqamətində addımlar atıldı. YAP bu prosesdə dövlətçilik maraqlarının müdafiəsi, cəmiyyətin səfərbər edilməsi və inkişaf strategiyasına dəstək göstərilməsi ilə aparıcı siyasi qüvvələrdən birinə çevrildi. 1995-ci il noyabrın 12-də keçirilən parlament seçkilərində əldə etdiyi qələbə partiyanın siyasi sistemdə mövqeyinin gücləndiyini göstərdi.
Heydər Əliyevin rəhbərliyi illərində YAP geniş təşkilati struktura və ölkə miqyasında fəaliyyət imkanlarına malik siyasi təşkilat kimi formalaşdı. Partiyanın inkişaf istiqamətləri müəyyənləşdirilərkən milli maraqların qorunması, dövlətçilik ənənələrinin gücləndirilməsi, xalqla hakimiyyət arasında etimadın artırılması və Azərbaycanın beynəlxalq mövqelərinin möhkəmləndirilməsi əsas prioritetlər sayılırdı.
Ulu Öndərin siyasi kursu bu gün Azərbaycan Prezidenti və YAP-ın sədri İlham Əliyev tərəfindən dövrün çağırışlarına uyğun davam etdirilir. Onun rəhbərliyi ilə ölkə siyasi, iqtisadi, sosial, hərbi və diplomatik sahələrdə nailiyyətlər əldə edib. 2020-ci ilin 44 günlük Vətən müharibəsində qazanılan Zəfər ərazi bütövlüyünün bərpası və dövlətçilik tarixində yeni mərhələnin başlanması baxımından mühüm əhəmiyyət daşıyır. 2023-cü ildə suverenliyin ölkənin bütün ərazisində tam bərpa olunması yeni reallıq yaradıb. YAP bu proseslərdə siyasi mövqeyi və təşkilati fəaliyyəti ilə iştirak edən aparıcı qüvvələr sırasındadır.
Hazırda partiya ölkənin siyasi həyatında mühüm mövqeyə, geniş sosial bazaya və təşkilati şəbəkəyə malikdir. Fəaliyyətinin başlıca istiqamətləri müstəqilliyin möhkəmləndirilməsi, Prezident İlham Əliyevin inkişaf strategiyasına dəstək, milli maraqların müdafiəsi, ictimai-siyasi sabitliyin qorunması və Azərbaycanın beynəlxalq mövqelərinin gücləndirilməsidir.
Gənclərin ictimai-siyasi proseslərdə iştirakının artırılması, dövlətçilik ruhunda yetişməsi, milli-mənəvi dəyərlərə bağlılığının gücləndirilməsi və ölkənin gələcək inkişafına cəlb edilməsi də diqqət mərkəzindədir. Təsis konfransının keçirildiyi 21 noyabrın əhəmiyyətinin gənc nəslə çatdırılması, müstəqillik tarixinin, dövlətçilik ənənələrinin və ilk illərdə yaşanan çətinliklərin öyrənilməsi vacib sayılır.
Beləliklə, 21 Noyabr milli birlik, dövlətçilik iradəsi, müstəqilliyə sədaqət və gələcəyə inamla əlaqələndirilir. Bu tarix Heydər Əliyevin dövlətçiliyin möhkəmləndirilməsi sahəsindəki xidmətlərini xatırlamaq, onun siyasi irsini öyrənmək və gələcək nəsillərə ötürmək baxımından əhəmiyyət daşıyır.