QafqazNews Demokrat.az-a istinadən xəbər verir ki, arıqlamaq arzusu bəzi insanlarda anoreksiya da daxil olmaqla ciddi qidalanma pozuntusuna çevrilə bilər. Psixologiya üzrə fəlsəfə doktoru Yelena Şpagina bu prosesin beş mərhələdən keçə biləcəyini bildirib.

Şpagina açıqlamasında ilkin mərhələnin cəmiyyətdə, reklamda və sosial şəbəkələrdə arıq bədən quruluşunun ideal kimi göstərilməsi ilə bağlı olduğunu deyib. İnsan özünü həmin təsvirlərlə tutuşdurduqca görünüşündən narazı qala, utanc və narahatlıq hiss edə bilər.

Daha sonra bədən quruluşunu dəyişmək istəyi yaranır. İnsan pəhrizə başlayır, qida miqdarını azaldır və çəkisini davamlı izləyir. Əvvəlcə bu addımlar ona müəyyən nəticə əldə etdiyi və özünü idarə etdiyi hissini versə də, vaxt keçdikcə qidaya münasibəti dəyişə bilər.

Mütəxəssisin sözlərinə görə, aclıq və qida məhdudiyyətləri yemək, eləcə də çəki barədə narahatlığı artırır. Bunun nəticəsində qidadan imtina tədricən avtomatik davranışa çevrilə bilər.

Şpagina anoreksiya riskinin yalnız zahiri görünüşdən narazılıqla bağlı olmadığını vurğulayıb. Uşaqlıq travmaları, təhqir, emosional zorakılıq və digər mənfi yaşantılar da bu pozuntuya meyilliliyi artıra bilər.

Mükəmməllikçilik, sərt düşüncə tərzi və səhv etməkdən çəkinmək də risk amilləri hesab olunur. Bu xüsusiyyətləri olan insanlar arıqlığı şəxsi dəyərin, cəlbediciliyin və uğurun əsas ölçüsü kimi görə bilərlər.

Mütəxəssis qeyd edib ki, müasir elmdə anoreksiya genetik, neyrobioloji, psixoloji və sosial amillərin qarşılıqlı təsiri ilə formalaşan mürəkkəb pozuntu sayılır. Buna görə də onu yalnız pəhriz və çəki problemi kimi qiymətləndirmək doğru deyil.