QafqazNews Baku.ws-a istinadən xəbər verir ki, Azərbaycan və Böyük Britaniya müdafiə və təhlükəsizlik üzrə əməkdaşlığı genişləndirmək, regional və beynəlxalq təhdidlərə qarşı birgə fəaliyyət imkanlarını artırmaq niyyətindədir.

Bu istiqamətlər iki ölkənin strateji tərəfdaşlığına dair imzaladığı birgə bəyannamədə yer alıb. Sənəd müdafiə sənayesi, hərbi təlimlər, potensialın inkişafı və təhlükəsizlik sahəsində əlaqələrin möhkəmləndirilməsini əhatə edir.

Hərbi ekspert Üzeyir Cəfərov sənədin imzalanmasını Azərbaycan-Böyük Britaniya münasibətləri baxımından əhəmiyyətli hesab edib. Onun sözlərinə görə, bəyannamədə regional sülh və sabitliyin təşviqi, ortaq təhdidlərin qarşısının alınması və bu sahələrdə birgə fəaliyyətin artırılması nəzərdə tutulur.

Ekspert qeyd edib ki, iki ölkə hərbi sahədə uzun müddətdir əməkdaşlıq edir. Əvvəllər Britaniyanın Azərbaycandakı səfirliyində hərbi attaşe olmayıb və əlaqələr başqa ölkədə fəaliyyət göstərən attaşe vasitəsilə əlaqələndirilib. Hazırda isə Böyük Britaniya Azərbaycana öz hərbi attaşesini təyin edib. Cəfərovun fikrincə, bu addım müdafiə və təhlükəsizlik məsələləri üzrə əlaqələrin, müzakirələrin və qarşılıqlı səfərlərin daha yaxından təşkilinə imkan verir.

Cəfərov bildirib ki, Azərbaycan Silahlı Qüvvələrinin zabitləri Britaniyada mütəmadi olaraq kurslara qatılırlar. Bu proqramlar həm NATO çərçivəsində, həm də ikitərəfli formatda keçirilir və zabitlərin dil bacarıqlarının, eləcə də dünyagörüşünün inkişafına xidmət edir.

Ekspertin sözlərinə görə, əməkdaşlıq yalnız Müdafiə Nazirliyi ilə məhdudlaşmır; Böyük Britaniya Dövlət Sərhəd Xidməti və digər qurumlarla da əlaqələr saxlayır. O, bunun gələcək əməkdaşlıq üçün imkanları artırdığını, tərəflərin regional sülh və sabitlik məsələlərində diplomatik və hərbi sahələrdə oxşar mövqelər bölüşdüyünü vurğulayıb.

Cəfərov dünyada müdafiə və təhlükəsizlik sahəsində müxtəlif problemlərin və təhdidlərin mövcud olduğunu, Azərbaycanla Böyük Britaniyanın onların qarşısının alınması istiqamətində əməkdaşlıq etdiyini deyib. O, Azərbaycanın Britaniya ilə münasibətlərə önəm verdiyini, Böyük Britaniyanın isə Azərbaycanın müstəqilliyinin ilk illərindən iqtisadi və başqa sahələrə xüsusi diqqət göstərdiyini bildirib.

Ekspert əlavə edib ki, Azərbaycan Müdafiə Sənayesi Nazirliyi xətti ilə istehsal olunan bəzi avadanlıq və məhsulları Britaniyaya təklif edir. Hərbi təyinatlı, müdafiə və təhlükəsizlik avadanlıqları ilə bağlı tərəflər bəzən razılığa gəlir və əməkdaşlıq müsbət nəticə verir. Cəfərov Qarabağ məsələsində Böyük Britaniyanın nümayiş etdirdiyi prinsipial mövqenin Azərbaycan tərəfindən yüksək qiymətləndirildiyini də qeyd edib.