QafqazNews Demokrat.az-a istinadən xəbər verir ki, türkiyəli aktyor Selahattin Paşalı ilə həyat yoldaşı Lara Paşalının ayrılacağı barədə iddialar yenidən müzakirə olunur. Aktyorun menecerlik komandası yayılan məlumatların həqiqəti əks etdirmədiyini bildirib.
Persona Menajerlik şirkəti rəsmi Instagram hesabının hekayələr bölməsində açıqlama paylaşaraq Paşalının ailə həyatı haqqında yayılan xəbərləri təkzib edib. Bildirilib ki, müxtəlif media orqanları və sosial şəbəkə profilləri üzərindən yayılan iddialar aktyorun şəxsi həyatını hədəfə alan qarayaxma kampaniyasına çevrilib.
Komanda məsələ ilə bağlı indiyədək açıqlama verilməməsinin xəbərlərin doğru olduğu kimi yozulmamalı olduğunu qeyd edib. Açıqlamada vurğulanıb ki, şəxsin ictimai fəaliyyəti onun özəl həyatı barədə əsassız məlumatların yayılmasına əsas vermir.
Şirkət sözügedən paylaşımların yayımının dayandırılmasını və silinməsini istəyib. Tələbin yerinə yetirilməyəcəyi təqdirdə, məlumatları yayan şəxslər və media qurumlarına qarşı hüquqi tədbirlərin görüləcəyi bildirilib.
Selahattin Paşalı 16 aprel 2022-ci ildə Bodrumda Lara Paşalı ilə evlənib. Həmin ilin iyulunda onların Leyla Pera adlı qız övladı dünyaya gəlib. Cütlüyün ayrılacağı ilə bağlı söz-söhbət bu ilin aprelindən yayılmağa başlayıb. O zaman Paşalılar birgə açıqlama verərək evliliklərində çətin dövr yaşadıqlarını bildirmişdilər.
Menecerlik komandasının son açıqlamasında boşanma ilə bağlı konkret təsdiq və ya təkzib yer almayıb. Bu məqam mövzunun yenidən gündəmə gəlməsinə səbəb olub.
